మోడీ వన్ మ్యాన్‌ షో: చంద్రబాబుపై విముఖత?

హైదరాబాద్: బిజెపి, తెలుగుదేశం పార్టీ మధ్య పొత్తు వ్యవహారంలో కొత్త సమస్య తలెత్తిననట్లు తెలుస్తోంది. ఇరు పార్టీల మధ్య ఇటు తెలంగాణలోనూ అటు సీమాంధ్రలోనూ పొత్తు కుదిరింది. దాదాపుగా సీట్ల పంపకం కూడా జరిగిపోయింది. బిజెపి ప్రధాని అభ్యర్థి నరేంద్ర మోడీ తెలుగుదేశం పార్టీ అధ్యక్షుడు నారా చంద్రబాబు నాయుడితో వేదికను పంచుకోవడానికి ఇష్టంగా లేరంటూ జాతీయ మీడియాలో వార్తలు వచ్చాయి.

సీమాంధ్రలో తన పర్యటన వన్ మ్యాన్ షోగా ఉండాలని నరేంద్ర మోడీ భావిస్తున్నట్లు సమాచారం. చంద్రబాబు మాత్రం మోడీతో వేదికను పంచుకోవడానికి ఇష్టపడుతున్నారని తెలుస్తోంది. మోడీ పవనాలను తనకు అనుకూలంగా మార్చుకోవడానికి చంద్రబాబు మోడీతో కలిసి ప్రచార సభలో పాల్గొనాలని భావిస్తున్నారట.

నరేంద్ర మోడీ విశాఖపట్నం, విజయవాడ, రాజమండ్రి, తిరుపతి ప్రచార సభల్లో పాల్గొంటారు. ఈ సభలు ఏప్రిల్ 20, మే 5 తేదీల మధ్య ఉంటాయని అంటున్నారు. ఉమ్మడి ప్రచారానికి చంద్రబాబు పట్టుబడుతుండడంతో బిజెపి నాయకులు తేదీలను ఖరారు చేయలేకపోతున్నట్లు తెలుస్తోంది. దేశవ్యాప్తంగా మోడీ ఒంటరిగానే ప్రచారం సాగిస్తున్నారు. సీమాంధ్రలో కూడా అలాగే ఉండాలని ఆయన భావిస్తున్నారు.

మోడీ, చంద్రబాబు కలిసి ప్రచారం సాగిస్తే ఇరు పార్టీలకు ప్రయోజనకరంగా ఉంటుందని టిడిపి నాయకులు అంటున్నారు. అయితే, తాము అయోమయంలో ఏమీ లేమని బిజెపి నాయకులు అంటున్నారు. పిఎంగా మోడీ, సిఎంగా నాయుడు అనే నినాదంతోనే తాము ప్రచారం సాగిస్తామని వారంటున్నారు.

English summary

According to national media - Even as the BJP and the TDP are wrangling over key seats in the Seemandhra region, fresh trouble is brewing for their alliance. And it involves none other than Narendra Modi and N Chandrababu Naidu, the two key leaders in their respective parties.