AP DSC 2024: ఇవాళ డీఎస్సీ నోటిఫికేషన్ - వెబ్ సైట్లో దరఖాస్తుల స్వీకరణ- పూర్తి వివరాలివే..!

ఏపీలో 6100 ఉపాధ్యాయ ఉద్యోగాల భర్తీ కోసం ప్రభుత్వం సిద్ధమవుతోంది. ఇందులో భాగంగా ఇప్పటికే ఉద్యోగాల భర్తీ కోసం నిర్వహించే టెట్, డీఎస్సీ పరీక్షల షెడ్యూల్ ను విడుదల చేసింది. వీటి ప్రకారం ఇవాళ డీఎస్సీ నోటిఫికేషన్ విడుదల కానుంది. అధికారికంగా వెబ్ సైట్ ప్రారంభం, దరఖాస్తుల స్వీకరణ ప్రక్రియ కూడా మొదలు కానుంది. దీనికి సంబంధించిన వివరాలు ఇలా ఉన్నాయి.

ఉపాధ్యాయ ఉద్యోగాల భర్తీ కోసం టెట్, డీఎస్సీని ప్రభుత్వం వేర్వేరుగా నిర్వహిస్తోంది. రెండు పరీక్షల్నీ కంప్యూటర్ విధానంలోనే నిర్వహిస్తున్నారు. వీటి నిర్వ హణలో అభ్యర్ధులకు ఎలాంటి ఇబ్బందులు లేకుండా ఎప్పటికప్పుడు పూర్తి సమాచారం అందించేందుకు వీలుగా డీఎస్సీకి సంబంధించిన అధికారిక వెబ్ సైట్ ను ప్రభుత్వం ప్రారంభిస్తోంది. https://apdsc.apcfss.in/ పేరుతో రూపొంందించిన ఈ వెబ్ సైట్ ను విద్యాశాఖ మంత్రి బొత్స సత్యనారాయణ ఇవాళ అధికారికంగా ప్రారంభిస్తారు.

https://apdsc.apcfss.in/ వెబ్ సైట్ ఇప్పటికే సిద్ధం చేశారు. అయితే ఇందులో ఆప్షన్లు పూర్తిగా ఓపెన్ కాలేదు. ఇవాళ మంత్రి అధికారికంగా ప్రారంభించిన తర్వాత ఇందులో దరఖాస్తుల స్వీకరణ, ఫీజు చెల్లింపుతో పాటు ఇతర ఆప్షన్లు అందుబాటులోకి వస్తాయి. వీటికి ముందే మంత్రి డీఎస్సీ నోటిఫికేషన్ ను అధికారికంగా విడుదల చేస్తారు. అనంతరం వెబ్ సైట్ ను కూడా ప్రారంభిస్తారు. దీంతో పాటే దరఖాస్తుల స్వీకరణ ప్రారంభమవుతుంది.

ఈసారి ప్రభుత్వం విడుదల చేసిన షెడ్యూల్ ప్రకారం డీఎస్సీ అప్లికేషన్ల స్వీకరణ ఇవాళ ఆన్ లైన్ లో ప్రారంభమవుతుంది. ఆన్ లైన్లోనే ఫీజు చెల్లించేందుకు ఆప్షన్ ఉంటుంది. వచ్చే నెల 15 నుంచి 30 వరకూ డీఎస్సీ పరీక్షలు ఉంటాయి. మార్చి 31 కల్లా ప్రాథమిక ఆన్సర్ కీ విడుదల చేస్తారు. అభ్యంతరాలు తెలిపేందుకు ఏప్రిల్ 1 వరకూ అవకాశం కల్పిస్తారు. అనంతరం ఏప్రిల్ 2న తుది ఆన్సర్ కీ విడుల చేస్తారు. అనంతరం ఏప్రిల్ 7న ఫలితాలు ప్రకటిస్తారు.

English summary

ap government to release notification for DSC 2024 today. with this, the application process will begin on the official website.