ఆ విద్యార్థులకు స్పెషల్ ఎగ్జామ్-CBSE ప్రకటన..!!

న్యూఢిల్లీ: విద్యార్థుల సౌకర్యాన్ని దృష్టిలో ఉంచుకుని సెంట్రల్ బోర్డ్ ఆఫ్ సెకండరీ ఎడ్యుకేషన్ (సీబీఎస్ఈ) కీలక నిర్ణయం తీసుకుంది. హోలీ పండుగ వేడుకల కారణంగా మార్చి 15, 2025న పరీక్షకు హాజరుకాలేని విద్యార్థులకు ప్రత్యేక పరీక్ష నిర్వహించనున్నట్లు సీబీఎస్ఈ ప్రకటించింది.

సాధారణంగా హోలీ పండుగ మార్చి 14న జరుపుకుంటారు. అయితే, కొన్ని ప్రాంతాల్లో మార్చి 15న కూడా హోలీ వేడుకలు కొనసాగే అవకాశం ఉంది. ఈ నేపథ్యంలో, విద్యార్థులు పరీక్షకు హాజరయ్యేందుకు ఇబ్బంది పడతారని గుర్తించిన సీబీఎస్ఈ ఈ ప్రత్యేక ఏర్పాట్లు చేసింది.

మార్చి 15న పరీక్షకు హాజరుకాలేని విద్యార్థులు ఆ రోజు పరీక్ష రాయకుండా ఉండవచ్చు. వారికి ప్రత్యేకంగా మరో తేదీన పరీక్ష నిర్వహిస్తారు. జాతీయ, అంతర్జాతీయ క్రీడా పోటీల కారణంగా పరీక్షలకు హాజరుకాలేని విద్యార్థులతో పాటు వీరికి కూడా పరీక్షలు నిర్వహిస్తారు.

సీబీఎస్ఈ బోర్డు పరీక్షల షెడ్యూల్ ప్రకారం, మార్చి 15న 12వ తరగతి హిందీ కోర్ (302), హిందీ ఎలెక్టివ్ (002) పరీక్షలు జరగాల్సి ఉంది. 12వ తరగతి పరీక్షలు ఏప్రిల్ 2 వరకు, 10వ తరగతి పరీక్షలు మార్చి 18 వరకు కొనసాగుతాయి.

"మార్చి 15న పరీక్షలు జరుగుతాయి. అయితే, ఆ రోజు పరీక్షకు హాజరుకావడం కష్టమని భావించే విద్యార్థులు పరీక్షకు రాకుండా ఉండవచ్చు. సీబీఎస్ఈ విధానం ప్రకారం వారికి ప్రత్యేక పరీక్ష నిర్వహించే అవకాశం కల్పిస్తాం" అని సీబీఎస్ఈ అధికారిక ప్రకటనలో తెలిపింది.

ప్రత్యేక పరీక్షకు ఎలా దరఖాస్తు చేసుకోవాలనే వివరాలను సీబీఎస్ఈ త్వరలో విడుదల చేయనుంది. ఈ ప్రత్యేక ఏర్పాట్ల ద్వారా హోలీ వేడుకల కారణంగా ఏ విద్యార్థి కూడా నష్టపోకుండా సీబీఎస్ఈ చర్యలు తీసుకుంటోంది.

English summary

CBSE has taken a decision to conduct the exam for the students on other day that falls on holy festival i.e March 15th.