గుడ్ న్యూస్ : భారత నౌకాదళంలో ఉద్యోగం చేయాలనుకుంటున్నారా..?

నిరుద్యోగ అభ్యర్థులకు భారత నౌకాదళం తీపికబురు ప్రకటించింది. అగ్నివీర్ పథకం కింద 01/2027, 02/2027 బ్యాచ్‌లలో ఖాళీల భర్తీకి నోటిఫికేషన్ విడుదల చేసింది. అగ్నివీర్ విభాగంలో 01/2027, 02/2027 బ్యాచ్‌ల ఖాళీలను భర్తీ చేసేందుకు నోటిఫికేషన్ విడుదల చేసింది. ఆసక్తి గల అభ్యర్థులు 2026 మార్చి 14వ తేదీ నుంచి ఏప్రిల్ 6వ తేదీ సాయంత్రం 5 గంటల వరకు ఆన్‌లైన్ ద్వారా తమ అప్లికేషన్లను సమర్పించవచ్చు. అభ్యర్థులు అధికారిక వెబ్‌సైట్ ద్వారా తమ అప్లికేషన్లను సమర్పించాలని స్పష్టం చేసింది. దేశ రక్షణ రంగంలో స్థిరపడాలనుకునే అవివాహిత పురుషులు, మహిళా అభ్యర్థులకు ఇది ఒక గొప్ప అవకాశం. ఈ ఉద్యోగాల గురించి పూర్తి వివరాలు మీకోసం ప్రత్యేకంగా..

విద్యార్హత..

ఈ పోస్టులకు దరఖాస్తు చేసుకునే అభ్యర్థులు ఇంటర్మీడియట్ (10+2)లో గణితం, ఫిజిక్స్ సబ్జెక్టులతో కనీసం 50 శాతం మార్కులు సాధించి ఉండాలి. అదనంగా గుర్తింపు పొందిన పాలిటెక్నిక్ కళాశాల నుంచి ఏదైనా ఇంజనీరింగ్ విభాగంలో మూడు సంవత్సరాల డిప్లొమా పూర్తి చేసిన అభ్యర్థులు కూడా అర్హులు. అలాగే ఫిజిక్స్, మ్యాథ్స్ సబ్జెక్టులతో రెండేళ్ల వొకేషనల్ కోర్సు పూర్తి చేసిన వారికి కూడా దరఖాస్తు చేసుకునే అవకాశం కల్పించారు.

వయోపరిమితి..

వయస్సు పరిమితి విషయంలో రెండు బ్యాచ్‌లకు వేర్వేరు నిబంధనలు ఉన్నాయి. 01/2027 బ్యాచ్‌కు దరఖాస్తు చేసుకునే అభ్యర్థులు 2004 డిసెంబర్ 1 నుంచి 2009 మే 31 మధ్య జన్మించి ఉండాలి. అలాగే 02/2027 బ్యాచ్‌కు దరఖాస్తు చేసుకునే వారు 2005 మే 1 నుంచి 2009 అక్టోబర్ 31 మధ్య జన్మించి ఉండాలి. అభ్యర్థులు అవివాహితులై ఉండాలి. ఎంపికైన వారు శిక్షణ కాలంతో పాటు నాలుగు సంవత్సరాల సేవా కాలం పూర్తయ్యే వరకు వివాహం చేసుకోవద్దనే నిబంధన కూడా ఉంటుంది.

జీతభత్యాలు & ప్రయోజనాలు..

అగ్నివీర్‌గా ఎంపికైన అభ్యర్థులకు ఆకర్షణీయమైన జీతభత్యాలు అందిస్తారు. ప్రారంభంలో నెలకు రూ.30,000 వేతనం ఉంటుంది. ప్రతి ఏడాది జీతంలో పెరుగుదల కూడా ఉంటుంది. నాలుగు సంవత్సరాల సేవ పూర్తయ్యాక వడ్డీతో కలిపి సుమారు రూ.10.04 లక్షల సేవా నిధి ప్యాకేజీని ప్రభుత్వం అందిస్తుంది.

అదనంగా రూ.48 లక్షల నాన్-కంట్రిబ్యూటరీ లైఫ్ ఇన్సూరెన్స్ కవర్ కూడా లభిస్తుంది. సేవా కాలంలో గాయాలు లేదా ప్రమాదాల సందర్భంలో ప్రత్యేక ఆర్థిక సాయం కూడా అందించబడుతుంది. అలాగే అగ్నివీర్‌గా సేవ పూర్తి చేసిన తర్వాత వివిధ రంగాల్లో ఉద్యోగ అవకాశాలకు కూడా ప్రాధాన్యం కల్పించే అవకాశం ఉంది.

ఎంపిక ప్రక్రియ..

అభ్యర్థుల ఎంపిక రెండు దశల్లో జరుగుతుంది. మొదటి దశలో 2026 మే నెలలో ఆన్‌లైన్ కంప్యూటర్ ఆధారిత పరీక్ష నిర్వహిస్తారు. ఈ పరీక్షలో ఇంగ్లీష్, సైన్స్, మ్యాథ్స్, జనరల్ అవేర్‌నెస్ విభాగాల నుంచి మొత్తం 100 ప్రశ్నలు ఉంటాయి. ప్రతి తప్పు సమాధానానికి 1/4 నెగటివ్ మార్కింగ్ విధానం ఉంటుంది.

మొదటి దశలో ఉత్తీర్ణులైన అభ్యర్థులను రెండో దశకు ఎంపిక చేస్తారు. రెండో దశలో ఫిజికల్ ఫిట్‌నెస్ టెస్ట్ (PFT), రాత పరీక్ష, మెడికల్ పరీక్ష నిర్వహిస్తారు. ఈ దశలో అభ్యర్థుల శారీరక సామర్థ్యం, ఆరోగ్య స్థితి, మానసిక సామర్థ్యాన్ని కూడా పరిశీలిస్తారు.

ఫిజికల్ ఫిట్‌నెస్ ప్రమాణాలు..

అభ్యర్థులు నిర్దిష్ట శారీరక ప్రమాణాలను కూడా పూర్తి చేయాలి. పురుష అభ్యర్థులు నిర్దిష్ట సమయంలో 1.6 కిలోమీటర్ల పరుగును పూర్తి చేయాలి. మహిళా అభ్యర్థులకు కూడా వేర్వేరు ఫిట్‌నెస్ ప్రమాణాలు ఉంటాయి. అలాగే పుష్-అప్స్, సిట్-అప్స్ వంటి శారీరక పరీక్షలు కూడా నిర్వహిస్తారు.

దరఖాస్తు ఫీజు..

దరఖాస్తు చేసుకునే అభ్యర్థులు రూ.550తో పాటు 18 శాతం జీఎస్టీ చెల్లించాల్సి ఉంటుంది. ఫీజును ఆన్‌లైన్ విధానంలోనే చెల్లించాలి.

దరఖాస్తు విధానం..

ఆసక్తి గల అభ్యర్థులు అధికారిక వెబ్‌సైట్ Join Indian Navy Official Website ద్వారా మాత్రమే దరఖాస్తు చేసుకోవాలి. అభ్యర్థులు ముందుగా రిజిస్ట్రేషన్ పూర్తి చేసి, అవసరమైన వివరాలను నమోదు చేసి అప్లికేషన్ సమర్పించాలి. ఫోటో, సంతకం, అవసరమైన విద్యార్హత సర్టిఫికేట్లను కూడా అప్లోడ్ చేయాలి.

అభ్యర్ధులకు కీలక సూచనలు..

అభ్యర్థులు దరఖాస్తు చేసే ముందు నోటిఫికేషన్‌లో పేర్కొన్న అన్ని అర్హతలు, నిబంధనలను జాగ్రత్తగా పరిశీలించాలి.

నిర్ణీత గడువులోగా ఆన్‌లైన్ దరఖాస్తు ప్రక్రియను పూర్తి చేయాలని అధికారులు సూచిస్తున్నారు.

దేశ సేవ చేయాలనుకునే యువతకు ఇది ఒక అద్భుతమైన అవకాశంగా మారే అవకాశం ఉంది.

English summary

The Indian Navy has announced a sweet news for the unemployed candidates. It has released a notification for filling vacancies in batches 01/2027 and 02/2027 under the Agniveer scheme. A notification has been released to fill vacancies in batches 01/2027 and 02/2027 in the Agniveer section.