Railway Recruitment Board: 22 వేల పోస్టుల భర్తీకి నోటిఫికేషన్

కేంద్ర ప్రభుత్వ ఉద్యోగాల కోసం ఎదురుచూస్తున్న యువతకు భారతీయ రైల్వే శుభవార్త చెప్పేందుకు సిద్ధమైంది. రైల్వే రిక్రూట్‌మెంట్ బోర్డ్ (RRB) గ్రూప్-D లెవల్-1 కేటగిరీ కింద భారీ నియామకాలకు అధికారికంగా సన్నాహాలు పూర్తి చేసింది. దేశవ్యాప్తంగా రైల్వే కార్యకలాపాలకు కీలకమైన విభాగాల్లో ఈ భర్తీ జరగనుండగా, పదో తరగతి అర్హత ఉన్న అభ్యర్థులకు ఇది అరుదైన అవకాశం కానుంది.

అధికారిక సమాచారం ప్రకారం, ఈ నియామక ప్రక్రియ ద్వారా సుమారు 22,000 గ్రూప్-D పోస్టులను భర్తీ చేయనున్నారు. ఇందులో ట్రాక్ మెయింటెనర్ గ్రేడ్-IV, పాయింట్స్‌మ్యాన్, అసిస్టెంట్ వంటి రైల్వే రోజువారీ నిర్వహణకు అవసరమైన కీలక ఉద్యోగాలు ఉన్నాయి. రైళ్ల భద్రత, ఆపరేషన్లు, నిర్వహణ సజావుగా సాగేందుకు ఈ పోస్టులు ముఖ్యమైన పాత్ర పోషిస్తాయి.

RRB షెడ్యూల్ ప్రకారం గ్రూప్-D భర్తీకి సంబంధించిన ఆన్‌లైన్ దరఖాస్తుల ప్రక్రియ జనవరి 21 నుంచి ప్రారంభమవుతుంది. అర్హులైన అభ్యర్థులు ఫిబ్రవరి 20 వరకు అప్లై చేసుకోవచ్చు. దరఖాస్తులు పూర్తిగా ఆన్‌లైన్‌లోనే స్వీకరిస్తారు. అధికారిక వెబ్‌సైట్ rrbapply.gov.in ద్వారా రిజిస్ట్రేషన్, అప్లికేషన్ సమర్పణ చేయాలి.

అర్హతల విషయానికి వస్తే, గుర్తింపు పొందిన బోర్డు నుంచి 10వ తరగతి ఉత్తీర్ణత తప్పనిసరి. కనీస వయస్సు 18 సంవత్సరాలు, గరిష్ట వయస్సు 33 సంవత్సరాలుగా నిర్ణయించారు. కేంద్ర ప్రభుత్వ నిబంధనల ప్రకారం ఓబీసీ అభ్యర్థులకు 3 సంవత్సరాలు, ఎస్సీ/ఎస్టీ అభ్యర్థులకు 5 సంవత్సరాల వయోసడలింపు వర్తిస్తుంది. ఐటీఐ లేదా NAC సర్టిఫికేట్ ఉన్న వారికి సాంకేతిక విభాగాల్లో అవకాశాలు మెరుగ్గా ఉండే అవకాశం ఉంది.

ఎంపిక ప్రక్రియ మూడు దశల్లో జరుగుతుంది. మొదట కంప్యూటర్ ఆధారిత పరీక్ష (CBT), ఆపై ఫిజికల్ ఎఫిషియెన్సీ టెస్ట్ (PET), చివరగా డాక్యుమెంట్ వెరిఫికేషన్ మరియు మెడికల్ పరీక్ష నిర్వహిస్తారు. ఎంపికైన అభ్యర్థులకు ఏడవ వేతన సంఘం ప్రకారం నెలకు రూ.18,000 ప్రాథమిక వేతనం లభిస్తుంది. దీనికి తోడు డీఏ, హెచ్ఆర్‌ఏ సహా ఇతర రైల్వే భత్యాలు కూడా అందుతాయి. స్థిరమైన ఉద్యోగ భద్రతతో పాటు కేంద్ర ప్రభుత్వ సౌకర్యాలు పొందాలనుకునే యువతకు ఇది మంచి అవకాశంగా నిపుణులు చెబుతున్నారు.

English summary

Indian Railways is set to recruit around 22,000 Group D Level 1 posts across India. Online applications will open from January 21 for candidates with Class 10 qualification. Check eligibility, age limit, selection process, and salary details.