'వారణాసి’ కోసం మహేష్ బాబు భారీ డీల్?

దర్శకధీరుడు ఎస్ఎస్ రాజమౌళి, సూపర్ స్టార్ మహేష్ బాబుల కలయికలో రాబోతున్న అంతర్జాతీయ స్థాయి అడ్వెంచర్ చిత్రం 'వారణాసి'. ఈ సినిమా గురించి రోజుకో వార్త సోషల్ మీడియాలో వైరల్ అవుతోంది. తాజాగా మహేష్ బాబు తీసుకుంటున్న రెమ్యునరేషన్, రాజమౌళి డీల్ గురించిన వివరాలు ఇండస్ట్రీ వర్గాల్లో హాట్ టాపిక్‌గా మారాయి.

మూడేళ్ల నిరీక్షణ.. కళ్లు చెదిరే పారితోషికం!
సాధారణంగా మహేష్ బాబు ఒక సినిమాకు రూ.100 నుంచి రూ.150 కోట్ల వరకు రెమ్యునరేషన్ తీసుకుంటారు. కానీ రాజమౌళి సినిమా కోసం ఆయన దాదాపు మూడేళ్ల కాలాన్ని కేటాయించారు. ఈ నేపథ్యంలో మహేష్ బాబు రెమ్యునరేషన్ డీల్ విభిన్నంగా ఉండబోతోందని సమాచారం. సినిమా నిర్మాణానికి పట్టే మూడేళ్ల కాలానికి గానూ.. ఏడాదికి రూ.50 కోట్ల చొప్పున మొత్తం రూ.150 కోట్ల ఫిక్స్‌డ్ ఫీజు మహేష్ బాబుకు అందుతోందని వార్తలు వస్తున్నాయి. కేవలం జీతమే కాకుండా, సినిమా వచ్చే లాభాల్లో 20 శాతం వాటా కూడా మహేష్ బాబుకు దక్కనుందట. ఒకవేళ సినిమా ఊహించిన విధంగా భారీ వసూళ్లు సాధిస్తే.. మహేష్ బాబు మొత్తం ఆదాయం రూ.250 కోట్ల మార్కును దాటే అవకాశం ఉంది.

రాజమౌళి సరికొత్త వ్యూహం
దర్శకుడు రాజమౌళి కూడా ఈ సినిమా కోసం భారీ డీల్ కుదుర్చుకున్నట్లు తెలుస్తోంది. ఆయన నేరుగా రెమ్యునరేషన్ తీసుకోకుండా, సినిమాకు సంబంధించిన ఓవర్సీస్ థియేట్రికల్ రైట్స్ తన వద్దే ఉంచుకున్నట్లు సమాచారం. ఇది భారతీయ సినిమా చరిత్రలోనే అతిపెద్ద ప్రాఫిట్ షేరింగ్ ఒప్పందంగా భావిస్తున్నారు.

టైమ్ ట్రావెల్ అడ్వెంచర్: రుద్రుడిగా మహేష్ బాబు
'వారణాసి' చిత్రంలో మహేష్ బాబు 'రుద్ర' అనే టైమ్ ట్రావెలర్ పాత్రలో కనిపిస్తున్నారు. ఈ సినిమా కథాంశం పురాణాలను, ఆధునిక కాల గమనాన్ని జోడిస్తూ.. అంటార్కిటికా నుంచి వారణాసి వరకు పలు ఖండాల్లో సాగుతుంది. ప్రియాంక చోప్రా సుమారు రూ.25-30 కోట్ల పారితోషికంతో 'మందాకిని' అనే పాత్రలో ఈమె కనిపించబోతున్నారు. ఈ చిత్రంలో పృథ్వీరాజ్ సుకుమారన్ 'కుంభ' అనే శక్తివంతమైన విలన్ పాత్రలో నటిస్తున్నారు.

ప్రేక్షకులకు గ్రాండ్ ట్రీట్
ఏప్రిల్ 7, 2027న ప్రపంచవ్యాప్తంగా ఐమాక్స్ ఫార్మాట్‌లో విడుదల కానున్న ఈ చిత్రానికి ఎంఎం కీరవాణి సంగీతం అందిస్తున్నారు. శ్రీ దుర్గా ఆర్ట్స్ బ్యానర్‌పై కె.ఎల్. నారాయణ ఈ ప్రతిష్టాత్మక చిత్రాన్ని నిర్మిస్తున్నారు. రాజమౌళి-మహేష్ బాబుల మొదటి కాంబినేషన్ కావడంతో ప్రపంచవ్యాప్తంగా ఈ సినిమాపై భారీ అంచనాలు నెలకొన్నాయి.

English summary

Superstar Mahesh Babu reportedly inks a record-breaking deal for Rajamouli's 'Varanasi'. With a 150 crore fixed salary and a 20% profit share, his total earnings may cross 250 crores.