తెలంగాణకు వైయస్ కొర్రీలు

తెలంగాణ అంశం కాంగ్రెస్ అధిష్ఠానవర్గం తెర మీదికి తెచ్చిన ప్రతిసారీ పంచాయతీరాజ్ శాఖ మంత్రి జెసి దివాకర్ రెడ్డి వితండ వాదనను ముందుకు తెస్తున్నారు. హైదరాబాద్ భవిష్యత్తును తేల్చిన తర్వాతనే రాష్ట్ర విభజనకు పూనుకోవాలని ఆయన అన్నారు. ఇదే మాట గతంలో కూడా అన్నారు. రాష్ట్రాన్ని విభజిస్తే అనంతపురం జిల్లాను కర్ణాటకలో కలపాలని ఆయన సూచించారు. నిజానికి, ఈ డిమాండ్లు ఆయన మనోభావాలను ప్రతిబింబించేవేనా అనేది ప్రశ్న. మనసులో ఒకటి పెట్టుకుని పైకి మరోటి మాట్లాడుతున్నారని ఆయన తీరును బట్టి తెలిసిపోతూనే ఉంది. తెలంగాణ రాష్ట్ర ఏర్పాటును అడ్డుకోవడమే ఆయన ప్రధాన లక్ష్యమనేది ఎవరికైనా ఇట్లే తెలిసిపోతుంది. ఢిల్లీలో కాంగ్రెస్ పార్టీ అధిష్ఠానవర్గం తెలంగాణ అంశాన్ని తేల్చడానికి ప్రయత్నించిన ప్రతిసారీ ముఖ్యమంత్రి డాక్టర్ వైయస్ రాజశేఖర రెడ్డి ఏదో రకమైన అడ్డుపుల్ల వేయడం, దివాకర్ రెడ్డి హైదరాబాదులో ఉండి ఆ మాటలను మాట్లాడడం ఒక విధానంగా వస్తున్నది. హైదరాబాద్ రాష్ట్ర రాజధాని కాకపోతే తాము వచ్చే వారమే కాదని ముఖ్యమంత్రి అంటున్నారు. తాము వచ్చి హైదరాబాదుకు ఏదో మేలు చేశామనే వైఖరి ఆయన మాటల్లో కనిపిస్తున్నది. నిజానికి, హైదరాబాదుకు వారు చేసిందేమీ లేదు. ఇక్కడి భూములను, ఆస్తులను వారు సొంతం చేసుకున్నారు. తెలంగాణ రాష్ట్రం ఏర్పడితే వాటికి ఏమైనా ఆటంకం ఏర్పడుతుందేమో అనే భయం కన్నా తమ ఆధిపత్యం పోతుందనే భయమే వారిని ఎక్కువగా వెంటాడుతున్నట్లుంది.

తెలంగాణ రాష్ట్రం ఏర్పడడం వల్ల హైదరాబాదులో ఉంటున్న ఇతర ప్రాంతాలవారెవరూ తరలిపోవాల్సిన అవసరం లేదనే విషయాన్ని వారు కావాలనే విస్మరిస్తున్నారు. కడప, అనంతపురం జిల్లాలకు చెందిన చాలా మంది తమ పెట్టుబడులను బెంగుళూరులో పెట్టారు. అక్కడ వ్యాపారాలు చేస్తున్నారు. జెసి దివాకర్ రెడ్డి వ్యాపారాలన్నీ బెంగుళూరులో ఉన్నాయని, అందుకే అనంతపురం జిల్లాను కర్ణాటకలో కలపాలని అంటున్నారని రాయలసీమకు చెందిన సిపిఐ నాయకుడు రామకృష్ణ అన్నారు. అనంతపురం జిల్లా ప్రజలు కర్ణాటకలో కలవాలని కోరుకోవడం లేదని ఆయన చెప్పారు. అంటే, రామకృష్ణ మాటల్లో ఏదో మేరకు సత్యం ఉందనే భావించాలి కదా. తెలంగాణ రాష్ట్రం ఏర్పడితే బెంగుళూరులో తమ వ్యాపార లావాదేవీలను కొనసాగిస్తున్నట్లుగానే హైదరాబాదులోనూ కొనసాగించవచ్చుననే విషయాన్ని వారు అంగీకరించడానికి సిద్ధంగా లేరు. ఇలా అంగీకరించకపోవడానికి వారి అధిపత్య ధోరణే కారణం. హైదరాబాదులోనూ, తెలంగాణ జిల్లాల్లోనూ ఉంటున్న తెలంగాణేతర ప్రజలు, నాయకులు, వ్యాపారవేత్తలు ఇక్కడి ప్రజలతో కలిసి పోలేదు. ఒక రకంగా ఈ ప్రాంతాన్ని తమ లాభాలకు, ప్రయోజనాలకు వేదికగా మార్చుకున్నారు. దీంతో రాష్ట్రంలోని ఇరు ప్రాంతాల ప్రజల మధ్య భావ సమైక్యత సాధ్యం కాలేదు. భావ సమైక్యత సాధ్యమై తమంతా తెలుగువారమని, కలిసి ఉండాలనే భావన ఏర్పడలేదు. తెలంగాణ రాష్ట్ర ఏర్పాటు డిమాండులో ఇది కూడా ఒక ప్రధానాంశం.

ఇకపోతే, రాజశేఖర రెడ్డి తెలంగాణను అడ్డుకోవడానికి మజ్లీస్ ను వాడుకుంటున్నారు. తమ నిర్ణయాన్ని పట్టించుకోకుండా తెలంగాణ రాష్ట్రం ఏర్పాటు చేయడానికి వీలు లేదని మజ్లీస్ నేత అసదుద్దీన్ ఓవైసీ అన్నారు. ఓవైసీ జాతీయ భద్రతా మండలి సమావేశంలో చేసిన ప్రసంగ పాఠం ప్రతిని మీడియాకు ఎపి భవన్ నుంచి, ముఖ్యమంత్రి కార్యాలయం నుంచి ప్రభుత్వమే విడుదల చేసింది. దీన్ని బట్టి రాజశేఖర రెడ్డి కుట్ర ఏమిటో అర్థం చేసుకోవచ్చు. ప్రధానంగా హైదరాబాదులో పెట్టుబడులు పెట్టినవారి అభిప్రాయాలను, ముస్లింలను అభిప్రాయాలను తీసుకుని మాత్రమే తెలంగాణపై నిర్ణయం తీసుకోవాలని ముఖ్యమంత్రి వాదిస్తున్నారు. నిజానికి, ఈ వాదనలో పస లేదు. గతంలో కొత్త రాష్ట్రాలను ఏర్పాటు చేసినప్పుడు ఇటువంటి అభిప్రాయాలేవీ తీసుకోలేదు. ఇంతకు ముందు సిపిఎం బూచీని చూపిన కాంగ్రెస్ నాయకులు ఇప్పుడు మజ్లీస్ ను అడ్డం పెడుతున్నారని అనుకోవాలి. మజ్లీస్ కూడా కాంగ్రెసుకు అనుకూలంగా వ్యవహరించడానికే సిద్ధపడింది. గతంలో సలావుద్దీన్ ఓవైసీ కాసు బ్రహ్మానందరెడ్డికి మద్దతుగా నిలిచినట్లుగానే ఇప్పుడు అసదుద్దీన్ ఓవైసీ రాజశేఖర రెడ్డి పంచన చేరారని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు వాదిస్తున్నారు. ఆయన మాటల్లో పూర్తి సత్యం ఉంది. అయితే, మజ్లీస్ సొంత రాజకీయ ప్రయోజనాల కోసమే ఆ విధంగా వ్యవహరిస్తోందనేది అందరూ ఎరిగిన సత్యమే.

మొత్తంగా, ఇప్పుడు కాంగ్రెస్ సమస్య తెలంగాణకు చుట్టుకుంది. తెలంగాణ విషయంలో తెలుగుదేశం పార్టీతో సహా అన్ని పార్టీలు అనుకూలంగా వ్యవహరిస్తున్న సమయంలో కాంగ్రెస్ మాత్రమే ఎటూ తేల్చడం లేదు. అలా తేల్చకపోవడం అది వచ్చే ఎన్నికల్లో తగిన ఫలితం అనుభవించక తప్పదు.