పక్కా ప్లాన్‌తోనే సూరి హత్య?

మద్దెలచెర్వు సూరి హత్యా పక్కా ప్లాన్ ప్రకారమే జరుగుతున్నట్టు పోలీసులు భావిస్తున్నారు. సూరిని హత్య చేసినట్టుగా ఆరోపణలు ఎదుర్కొంటున్న భానుకిరణ్ ముందుగానే సూరిని చంపాలని నిర్ణయించుకున్నారని చెప్పడానికి పోలీసులకు కొన్ని క్లూస్ దొరికినట్టుగా తెలుస్తోంది. సెటిల్‌ మెంట్‌ ల కారణంగా భానును సూరి ముందే చంపాలని నిర్ణయించుకున్నట్టు తెలుస్తోంది. దానిని పసిగట్టిన భాను పక్కా ప్లాన్‌ తో తనే ముందుగా సూరిని చంపాలనుకున్నాడు. తనను చంపేకన్నా సూరినే ముందుగా చంపాలని నిర్ణయించుకున్నట్టుగా తెలుస్తోంది. అందుకే ముందుగానే తన ఫ్యామిలీని నగరంనుండి తరలించినట్టుగా తెలుస్తోంది.

హత్య సోమవారం ఉదయం 9మందితో తన ఇంటిదగ్గరనుండి సనత్‌నగర్‌లోని తన లాయరు దగ్గరకు వెళ్లడానికి సూరి బయలుదేరాడు. ఆ సమయంలో సూరితో పాటు భానుకిరణ్, మధుసూధన్ కారులో ఎక్కారు. మరో అనుచరుడు సుధీర్ కారు ఎక్క చూస్తే అతనిని భాను అడ్డుకున్నట్టుగా తెలుస్తోంది. దాంతో మిగిలిన వారు మరో కారులో బయలుదేరారు. అంతేకాకుండా సూరిని చంపడానికి భాను ఉపయోగించిన తుపాకి సూరి గన్‌ మెన్‌ మన్మోహన్ ‌దని పోలీసులు భావిస్తున్నారు. దాంతో వారు గన్ ‌మెన్ ‌కోసం గాలింపు చర్యలు చేపట్టారు. సూరి తుపాకితో కూడా కాల్పులు జరిపి ఉండవచ్చునని పోలీసులు భావిస్తున్నారు.

అనుచరులను కారు ఎక్కకుండా అడ్డుకోవడం, తన తుపాకి ఉపయోగించకుండా వేరే తుపాకి ఉపయోగించడం తదితర అంశాలను పరిగణలోకి తీసుకొని ముందుగా పక్కా ప్లాన్‌తోనే హత్య చేసినట్టు పోలీసులు భావిస్తున్నారు. జూబ్లీహీల్సు కారు బాంబు పేలుడు కేసులో ప్రధాన నిందితుడు వాసుదేవరెడ్డిని కూడా పోలీసులు విచారించారు. పలువురు అనుమానితులను పోలీసులు అదుపులోకి తీసుకున్నారు. ప్రొఫెసర్ నారాయణరెడ్డి నేతృత్వంలో సూరి మృతదేహానికి పోస్టుమార్టం నిర్వహించారు. 8 బ్లడ్ శాంపిల్సు సేకరించారు. అనంతపురంలో సూరి అంత్యక్రియలకు ఏర్పాట్లు చేస్తున్నారు. గత 14 ఏళ్లనుండి సూరి తన స్వంత గ్రామం మద్దెలచెర్వు గ్రామానికి వెళ్లలేదు.