మాజీ నక్సలైట్ నయీమ్ మరణించాడా?

పటోళ్ల గోవర్ధన్ రెడ్డి హత్యతో మరోసారి మాజీ నక్సలైట్ నయీమ్ పేరు ప్రచారంలోకి వచ్చింది. మావోయిస్టులకు దూరమై నయీమ్ ఓ ముఠాను నడుపుతున్నట్లు ఆరోపణలు ఉన్న విషయం తెలిసిందే. మాజీ నక్సలైట్, తెలంగాణ రాష్ట్ర సమితి (తెరాస) నాయకుడు సాంబశివుడి హత్య సందర్భంలోనూ నయీమ్ పేరే ప్రముఖంగా వినిపించింది. ఐపియస్ అధికారి వ్యాస్ హత్య సహా పలు హత్య కేసుల్లో నిందితుడైన నయీమ్ చివరిసారి 2007 మార్చి 15వ తేదీన కనిపించాడు. ఐపియస్ అధికారి హత్య కేసులో కోర్టులో ప్రవేశపెట్టినప్పుడు పోలీసుల కళ్లు గప్పి నయీమ్ తప్పించుకున్నాడు. అప్పటి నుంచి అతని ఆచూకీ లేదు. అయితే, అతను మరణించి ఉంటాడనే అనుమానాలను వ్యక్తం చేస్తూ ఓ ప్రముఖ ఆంగ్ల దినపత్రిక శుక్రవారం ఓ వార్తాకథనాన్ని ప్రచురించింది.

తాను ఎకె 47 రైఫిల్‌ను నయీమ్ కోసం తెచ్చినట్లు ఆయుధాల అక్రమ రవాణా కేసులో అరెస్టైన నగరానికి చెందిన హిజ్బుల్ ముజహిదీన్ కార్యకర్త ముజీబ్జ అహ్మద్ పోలీసులకు చెప్పినట్లు ఆ పత్రిక రాసింది. సొహ్రబుద్దీన్ షేక్ అచూకీని నయీమ్ పోలీసులకు చేరవేసినట్లు కూడా అనుమానాలున్నాయి. సొహ్రబుద్దీన్‌ను గుజరాత్ పోలీసులు హతమార్చినట్లు ఆరోపణలు ఉన్న విషయం తెలిసిందే. 2005లో పౌర హక్కుల నేతల హత్యలకు కూడా నయీమ్ కారణమంటూ ఆరోపణలు వచ్చాయి. నల్లమల కోబ్రాస్, కాకతీయ కోబ్రాస్ అనే పేరు మీద వారిని హతమార్చింది నయీమ్ ముఠానే అని పౌర హక్కుల నాయకులు ఆరోపిస్తూ వచ్చారు.

గత కొద్ది కాలంగా కోబ్రాస్ మాట వినిపించడం లేదు. అసలు నయీమ్ ఎక్కడున్నాడనే విషయం మాత్రం ఎవరూ కనిపెట్టలేకపోయారు. నల్లగొండ జిల్లా భువనగిరికి చెందిన నయీమ్ నిరుటి వరకు హైదరాబాదు, హైదరాబాద్ పరిసర ప్రాంతాల్లో దండిగా ల్యాండ్ సెటిల్మెంట్లు చేసినట్లు ఆరోపణలున్నాయి. అయితే, నయీమ్ పక్షవాతానికి గురై మరణించినట్లు అనుమానాలు వ్యక్తమవుతున్నాయి. అతను కేరళలోని ఓ ఆస్పత్రిలో చికిత్స పొందినట్లు కూడా అనుమానాలు వ్యక్తమవుతున్నాయని ఆంగ్ల దినపత్రిక రాసింది. అయితే, నయీమ్ ఇంకా చురుగ్గానే ఉన్నాడని, పటోళ్ల గోవర్ధన్ రెడ్డి హత్యే అందుకు నిదర్శనమని అనేవాళ్లు కూడా ఉన్నారు.

English summary

Is Mohammed Nayeemuddin alias Nayeem, a renegade Maoist who is accused in several high profile criminal cases, including the murder of IPS officer Vyas, dead?