చంద్రబాబు కాల్ సెంటర్

తెలుగుదేశం పార్టీ కార్యాలయంలోకి అడుగు పెడితే మనకు టీ షర్టులు, జీన్స్ ప్యాంట్లు వేసుకున్న యువకులు హడావిడిగా తిరుగుతూ కనిపిస్తుంటారు. వారి హడావిడి, హంగామా చూస్తంటే అదేదో పార్టీ కార్యాలయం కాదని, కార్పోరెట్ ఆఫీసు కావచ్చునని అనిపించక మానదు. వారంతా రాజకీయ నాయకులు కాదు. పార్టీ టిక్కెట్ల కోసం క్యూలు కట్టినవారు కాదు. తెలుగుదేశం పార్టీ అధ్యక్షుడు నారా చంద్రబాబు నాయుడు పార్టీ కార్యాలయంలో ఒక కాల్ సెంటర్ పెట్టారు. వారంతా ఈ కాల్ సెంటరులో పనిచేసే సాంకేతిక నిపుణులను మనం భావించవచ్చు. ఎప్పటికప్పుడు ఓటర్ల నాడిని తెలుసుకుని అభ్యర్థులకు తగిన సూచనలు ఇవ్వడానికి, నియోజకవర్గాల్లో జరుగుతున్న పొరపాట్లను సరిదిద్దుకోవడానికి ఈ కాల్ సెంటర్ ను ఏర్పాటు చేశారు. కాల్ సెంటర్ పని చేస్తున్న ఉద్యోగులు నియోజకవర్గాలకు ఏవేవే నెంబర్లకు ఫోన్ చేసి పరిస్థితిని తెలుసుకుంటూ ఉంటారు.

ఈ కాల్ సెంటరును పార్టీ కార్యాలయంలోని గ్రంధాలయం హాలులో ఏర్పాటు చేశారు. ఇందులో 400 మందిదాకా పని చేస్తున్నారు. నెలకు 6 వేల రూపాయల జీతం మీద చంద్రబాబు వారిని నియమించినట్లు సమాచారం. ఈ కాల్ సెంటరులో 350 దాకా ఫోనులున్నాయి. దీన్ని నారాయణ ఎడ్యుకేషనల్ ఇనిస్టిట్యూట్స్ అధినేత నారాయణ పర్యవేక్షిస్తున్నారు. డైరెక్టరీ నుంచి ఏవో నెంబర్లను తీసుకుని ఫోన్ చేస్తుంటారు. ప్రశ్నలు వేస్తారు. దాన్ని బట్టి పరిస్థితిని అంచనా వేస్తారు. ఓటర్లను అడగాల్సిన ప్రశ్నలను తెలుగుదేశం పార్టీ రూపొందించి ఆ ఉద్యోగులకు ఇచ్చిందని సమాచారం. తాము ఓటర్ల నాడిని తెలుసుకోవడానికి మాత్రమే కాల్ సెంటర్ పెట్టామని తెలుగుదేశం నాయకులంటున్నారు.