వెంకయ్యకు కలిసొస్తుందా?

ప్రస్తుతం బిజెపిలో నెలకొన్న సంక్షోభం ఆంధ్రప్రదేశ్ కు చెందిన సీనియర్ పార్టీ నేత ఎం.వెంకయ్యనాయుడుకు కలిసి వచ్చే అవకాశం ఉంది. గతంలో కూడా ఆయన ఇలాగే లాభపడ్డారు. పార్టీలో సమస్య తలెత్తడంతో ఆయన బిజెపి అధ్యక్ష పదవిని చేపట్టారు. అయితే ఈసారి అధ్యక్ష పదవి దక్కకపోవచ్చు గానీ రాజ్యసభలో ప్రతిపక్ష నేత పదవి దక్కే అవకాశాలున్నాయి. ఆ పదవిలో ఉన్న అరుణ్ జైట్లీని తప్పించి వెంకయ్యనాయుడికి అప్పగించే అవకాశాలున్నట్లు వార్తలు వస్తున్నాయి. మొత్తం పార్టీ నాయకత్వ మార్పులో భాగంగా ఈ మార్పు చోటు చేసుకునే అవకాశం ఉన్నట్లు చెబుతున్నారు.

కలిసికట్టుగా పని చేసి పార్టీని పద్ధతిలో పెట్టాలని ఆర్ ఎస్ ఎస్ అధినేత మోహన్ భగవత్ సూచించిన నేపథ్యంలో బిజెపిలో పలు సంస్థాగత మార్పులు చోటు చేసుకోవచ్చునని చెబుతున్నారు నాయకత్వమార్పుపై, వారసత్వ ఎంపికపై చర్చలు జరుగుతున్నట్లు సమాచారం. శుక్రవారం రాత్రి బిజెపి నాయకులు అరుణ్ జైట్లీ, సుష్మా స్వరాజ్, అనంతకుమార్, వెంకయ్యనాయుడు భగవత్ ను కలిశారు. ఆ తర్వాత ఎల్ కె అద్వానీని ఆయన నివాసంలో కలిశారు.

కాందహార్ విషయంలోనూ, వోటుకు నోటు వ్యవహారంలోనూ అద్వానీపై ఎడతెగని విమర్శలు వస్తున్నాయి. పార్టీ అసమ్మతి నేతలు అద్వానీపై గురి పెట్టి విమర్శలు చేస్తున్నారు. బహిష్కృత నేత జస్వంత్ సింగ్ మాత్రమే కాకుండా అరుణ్ శౌరి, యశ్వంత్ సిన్హాలతో పాటు పలువురు విమర్శానాస్త్రాలు సంధిస్తున్నారు. పార్టీ వారసత్వ ఎంపిక గురించే భగవత్ తనను కలిసిన బిజెపి నేతలతో మాట్లాడినట్లు తెలుస్తోంది. తమ భేటీకి ప్రాధాన్యం లేదని వెంకయ్యనాయుడు చెప్పినప్పటికీ మార్పుల కోసమే ప్రయత్నాలు ప్రారంభమైనట్లు చెబుతున్నారు. అద్వానీతో పాటు రాజ్ నాథ్ సింగ్ పార్టీ నాయకత్వ బాధ్యతల నుంచి తప్పుకునే అవకాశం ఉన్నట్లు బలంగానే ప్రచారం జరుగుతోంది. ఈ స్థితిలో వెంకయ్యనాయుడు కలిసి రావచ్చునని అంటున్నారు.