వైయస్ జగన్ నిర్వేదం

కాంగ్రెసు కడప పార్లమెంటు సభ్యుడు వైయస్ జగన్ తీవ్ర నిర్వేదంలో కూరుకుపోయినట్లు తెలుస్తోంది. ముఖ్యమంత్రి పదవి కోసం తీవ్రంగా ఆరాట పడుతున్న జగన్ కు ఆశాభంగమే ఎదురయ్యే పరిణామాలు వరుసగా సంభవిస్తున్నాయి. దీంతో ఆయన తీవ్ర అసంతృప్తికి గురైనట్లు తెలుస్తోంది. దీంతో ఆయన కొంత అసహనానికి కూడా గురవుతున్నట్లు సన్నిహిత వర్గాలు చెబుతున్నాయి. రాష్ట్ర విభజన అంశం ముందుకు వచ్చి పార్టీ శాసనసభ్యులు, పార్లమెంటు సభ్యులు ప్రాంతాలవారీగా విడిపోవడంతో ఆయన ముఖ్యమంత్రి పదవిపై పెట్టుకున్న ఆశలు వమ్మైనట్లు భావిస్తున్నారు. తెలంగాణ, సమైక్యాంధ్ర అంశాలు ప్రధానంగా మారి తన రాష్ట్ర నాయకత్వ అంశం మరుగుపడిపోయే పరిస్థితి వచ్చింది. ఆయన కూడా అటో ఇటో తేల్చుకోవాల్సి వచ్చింది. బంగారు తెలంగాణను అందిస్తానని ఆయన చేసిన హామీ తెలంగాణలో ఏ మాత్రం పనిచేసే పరిస్థితి లేదు. పైగా, తెలంగాణ విద్యార్థులు, ప్రజలు ఆయనకు తీవ్ర వ్యతిరేకంగా ఉన్నారు. కరీంనగర్ జిల్లాలోని జగన్ కు చెందిన పవర్ ప్లాంట్ పై కూడా దాడి జరిగింది.

సమైక్యాంధ్ర నినాదంతో ఉద్యమించిన చిరంజీవి, మోహన్ బాబులపై వ్యక్తమవుతున్న వ్యతిరేకతే జగన్ పై కూడా తెలంగాణ ప్రాంతంలో వ్యక్తమవుతోంది. ఆయన స్పష్టంగా తన తెలంగాణ వ్యతిరేకతను బయట పెట్టుకుని, సమైక్యాంధ్ర నినాదం తీసుకోవడంతో రాష్ట్ర స్థాయి నాయకత్వ స్థాయిని కోల్పోయారు. రాష్ట్ర విభజన జరగకపోయినా ఆయనను తెలంగాణ ప్రజలు స్వీకరించే స్థితిలో లేరు. ఆయన వర్గానికి చెందిన తెలంగాణ మంత్రులు, శాసనసభ్యులు కూడా ఇప్పుడు తెలంగాణ నినాదాన్నే ప్రధాన ఎజెండాగా స్వీకరించారు. దివంగత నేత వైయస్ రాజశేఖర రెడ్డి ఉన్న కాలంలో తమకు అభివృద్ధి తెలంగాణ కావాలంటూ ఆయన వర్గీయులు వాదిస్తూ వచ్చారు. కానీ ఇప్పుడు ఆ స్థితి లేదు. తెలంగాణలోని కాంగ్రెసుకు సీమాంధ్ర నాయకులు దిశానర్దేశం చేసే పరిస్థితులు లేవు. దీంతో జగన్ సీమాంధ్ర నాయకుడిగానే మిగిలిపోతున్నారు. సీమాంధ్రలో కూడా తెలుగుదేశం పార్టీ అధ్యక్షుడు నారా చంద్రబాబు నాయుడు, ప్రజారాజ్యం అధ్యక్షుడు చిరంజీవితో ఆయన పోటీ పడాల్సిన స్థితి ఉంది. ఆయన ఏకైక నాయకుడయ్యే స్థితి కూడా లేదు.

జగన్ నిర్వేదం ప్రభావం సాక్షి టీవీ చానెల్ పై, పత్రికపై తీవ్రంగా పడుతోంది. ఏదీ తాను ముఖ్యమంత్రి కావడానికి పనికి వచ్చేట్లు లేకపోవడంతో సాక్షి టీవీ చానెల్ లో వార్తల సేకరణ పట్ల నిరాసక్తత నెలకొన్నట్లు తెలుస్తోంది. తెలంగాణ ఉద్యమానికి చెందిన వార్తలను సేకరించడానికి ఏ మాత్రం ఇష్టపడం లేదని సమాచారం. పైగా, జనవరి కానుకగా పలువురు తెలంగాణ జర్నలిస్టులకు ఉద్వాసన పలకడానికి కూడా రంగం సిద్ధమైనట్లు తెలుస్తోంది. కొంత మంది జర్నలిస్టులకు ఇప్పటికే ఆ సమాచారాన్ని అందించారని అంటున్నారు. మీడియాపై కూడా ఆధిపత్యం సంపాదించి అధికారాన్ని చేపట్టాలని చేసిన ప్రయత్నాలు ఫలించకపోవడం జగన్ కు తీవ్ర నిరాశ కలిగిస్తున్నట్లు తెలుస్తోంది.