జగన్ తిరుగుబాటు షురూ?

పార్టీ అధిష్టానంపై కాంగ్రెసు కడప పార్లమెంటు సభ్యుడు వైయస్ జగన్ ప్రత్యక్ష తిరుగుబాటు ప్రారంభమైనట్లే ఉంది. తూర్పు గోదావరి జిల్లా కాకినాడను వేదికను చేసుకుని ఆయన తిరుగుబాటు శ్రీకారం చుట్టారు. ఓదార్పు యాత్ర ముగింపు సభ ఈ విషయాన్ని స్పష్టం చేస్తోంది. రాష్ట్రంలో రాజ్యాంగ సంక్షోభాన్ని సృష్టించడానికి ఆయన సమాయత్తమైనట్లే కనిపిస్తోంది. కాకినాడ సభకు 25 మంది శాసనసభ్యులు, ముగ్గురు ఎమ్మెల్సీలు, పార్టీ నాయకులు వచ్చారు. వారందరితో జగన్ ముగింపు సభకు ముందు స్థానిక కాంగ్రెసు శాసనసభ్యుడు ద్వారంపూడి చంద్రశేఖర రెడ్డి నివాసంలో సమావేశమయ్యారు. ముగింపు సభకు తనకు అత్యంత విశ్వాసపాత్రుడైన ద్వారంపూడి చంద్రశేఖర రెడ్డి పూర్తి ఏర్పాట్లు చేశారు. స్థానికంగా ముత్తా గోపాలకృష్ణను కాదని, వైయస్ రాజశేఖర రెడ్డి ద్వారంపూడి చంద్రశేఖర రెడ్డికి టికెట్ ఇప్పించుకున్నారు. స్థానికంగా అసంతృప్తి, తిరుగుబాటు వ్యక్తమైనా వైయస్ ఖాతరు చేయలేదు. గెలిచిన తర్వాత జగన్ కు తోడుగా ఉంటూ ఆయన తన రుణం తీర్చుకుంటున్నట్లే ఉంది.

ద్వారంపూడి చంద్రశేఖర రెడ్డి నివాసంలో జగన్ తనకు మద్దతిస్తున్న శాసనసభ్యులతో భవిష్యత్తు వ్యూహంపై చర్చించారు. ఈ సమావేశంలో మంత్రి పిల్లి సుభాష్ చంద్రబోస్ తో పాటు కొండా సురేఖ, శ్రీనివాసులు, శ్రీకాంత్ రెడ్డి, ఆదినారాయణ రెడ్డి, శ్రీనివాసులు, అమర్నాథ్ రెడ్డి, శివప్రసాద్ రెడ్డి, మల్లాది విష్ణు, జోగి రమేష్, రామచంద్రారెడ్డి, అబ్బి వెంకటస్వామి, గుర్నాథ్ రెడ్డి, రాజేష్, నాని, రాజ అశోక్, తోట నరసింహం, వరప్రసాద్ తదితర శాసనసభ్యులు పాల్గొన్నారు. వారంతా అక్కడి నుంచి ముగింపు సభకు బయలుదేరారు.

ముందు అనుకున్నట్లుగానే శాసనసభ్యులు జగన్ ముగింపు సభకు తరలి వచ్చారు. ఇక తిరుగుబాటు తప్పదని భావించిన జగన్ వర్గం శాసనసభ్యులు, నాయకులు దండిగా సమీకరణ చేసి తమ సత్తా చాటుతున్నారు. తాను జగన్ వెంటనే ఉంటానని మంత్రి బాలినేని శ్రీనివాస్ రెడ్డి గురువారం ప్రకటించారు. పార్లమెంటు సభ్యులు సబ్బం హరి, మేకపాటి రాజమోహన్ రెడ్డి కూడా జగన్ కు మద్దతిస్తున్నారు. మొత్తం మీద, జగన్ జంగ్ షురూ అయినట్లే.