జగన్ వెనుకడుగు ఎందుకు?

మాజీ పార్లమెంటు సభ్యుడు వైయస్ జగన్మోహన్ రెడ్డి ఎమ్మెల్సీ ఎన్నికల పోటీ నుండి తప్పుకోవడానికి పలు కారణాలు కనిపిస్తున్నాయి. ఎమ్మెల్సీ ఎన్నికల్లో పోటీ చేయకుండా ఏదైనా వ్యూహ రచన చేస్తున్నారనే వాదలను వినిపించడంతో పాటు పార్టీ హడావుడిలో పడి ఎమ్మెల్సీ ఎన్నికలకు దూరమయ్యాడా అనే వారూ ఉన్నారు. అయితే జగన్ ఎమ్మెల్సీ ఎన్నికలకు దూరంగా ఉండటానికి మరికొన్ని కారణాలు కూడా కనిపిస్తున్నాయి. జగన్ పార్టీ పెట్టకముందే ఆయన వెంట చాలామంది మాజీలు వెళుతున్నారు. అయితే ఎమ్మెల్సీ ఎన్నికల్లో చాలామంది జగన్ వర్గం నేతలు పోటీ చేయడానికి సిద్ధంగా ఉన్నట్టుగా తెలుస్తోంది. అయితే తనకు ఉన్న ఎమ్మెల్యేలు, బలం పరిమితం. కాబట్టి తన వెంట ఉన్న వారిని ఆయన సంతృప్తి పరచలేడు. ఇంకా పార్టీని కూడా ప్రకటించక ముందే తనపై అసంతృప్తులు బయట పడితే ఆయనకు మొదటికే మోసం వస్తుంది కాబట్టే ఆయన తగ్గారని తెలుస్తోంది.

అంతేకాకుండా తనకు ఖచ్చితమైన ఎమ్మెల్యేలు ఎందరు మద్దతు పలుకుతున్నారో తెలియకుండా తన తరఫున వారిని రంగంలోకి దింపి తీరా ఓటమి చెందితే ఆ ప్రభావం త్వరలో రానున్న కడప, పులివెందుల ఎన్నికలపై పడుతుందని ఆయన భావిస్తున్నట్టుగా తెలుస్తోంది. గెలిస్తే ఫరవాలేదు. కానీ కాంగ్రెసు‌కు ఉన్న ఓటు బ్యాంకు దృష్ట్యా ఆయన ఓటమి చెందటం ఖాయంగా కనిపిస్తుంది. లేదా కాంగ్రెసు‌ను దెబ్బతీసినా తెలుగుదేశం బలపడే అవకాశం ఉంది. ఎటూ ఆయనకు లాభం లేదు. కాబట్టి ఎమ్మెల్సీ ఎన్నికలనుండి తప్పుకొని కడప ఉప ఎన్నికలలో ఎమ్మెల్సీ ప్రభావం పడకుండా, తన వెంట ఉన్న నేతలలో అసంతృప్తి ప్రబలకుండా ఆయన జాగ్రత్తలు తీసుకుంటున్నట్టుగా తెలుస్తోంది.

ఈ ఎన్నికలలో తన వర్గం వారిని వారి అంతరాత్మ ప్రభోదానుసారం ఓటు వేయాలని ఆయన కోరారు. ఎమ్మెల్సీ ఎన్నికల్లో పోటీ చేసి కాంగ్రెసు‌ను దెబ్బ తీస్తారని భావించిన ఆయన వర్గం వారికి ఇది చేదు వార్తే. అయితే జగన్ బహిరంగంగా కాకపోయినా అంతర్గతంగా తన వర్గం వారని పోటీకి నిలబెట్టడం విశేషం. గెలిస్తే జగన్ వర్గం గెలిచిందని, ఓడిపోతే నేను మద్దతు ప్రకటించలేదని చెప్పే అవకాశాలు ఉంటాయనే అనుకుంటున్నట్టుగా కనిపిస్తోంది. అంతేకాదు ఇతర నేతలు అసంతృప్తికి గురయ్యే అవకాశం లేకుండా ఉంటుందని భావిస్తున్నట్టుగా తెలుస్తోంది. కాబట్టి ఆయన కాంగ్రెసు‌కు ధీటుగా ఇతర అభ్యర్థులను నిలబెట్టినప్పటికీ బహిరంగంగా ప్రకటించడం లేదు.