ఆదికేశవులు చిరంజీవి పార్టీలోకేనా?

తెలుగుదేశం నుంచి బయటపడిన ఎంపీ ఆదికేశవులు నాయుడు కాంగ్రెస్ లో చేరతారని వార్తలు వస్తున్నా చివరికి ఆయన చూపు చిరంజీవి పార్టీ మీదికి మళ్ళినట్టు తెలుస్తోంది. ఆదికేశవులు మంగళవారం మధ్యహ్నం తిరుపతిలో అల్లు అరవింద్ తో సమావేశం కావడం విశేషం. ఆదికేసవులు నాయుడు సామాన్యుడు కాదు. ఆయనకు చెన్నైలో, బెంగుళూరులో కొన్ని వందల కోట్ల టర్నోవర్ గల వ్యాపారాలు ఉన్నాయి. వందకోట్లు పడేసి అయినా ఏ పార్టీ నుంచైనా రాజ్యసభ సభ్యుడు కాగల ఆర్ధిక బలం ఆయనకు ఉంది. అనేక ఎన్నికల్లో తెలుగుదేశం పార్టీకి ఆయన తన వంతుగా కోట్లాది రూపాయల పార్టీ ఫండ్ ఇచ్చినట్టు టిడిపి వర్గాలే చెబుతున్నాయి.

చంద్రబాబు నాయుడి వ్యవహార శైలి నచ్చక ఈమధ్య ఆదికేశవులు నాయుడు ఎదురుతిరిగారు. మన్మోహన్ సింగ్ ప్రభుత్వానికి అనుకూలంగా ఓటు వేసేందుకు సిద్ధమయ్యారు. ఆ తర్వాత బాబు ఆగ్రహానికి గురైన ఆయన కాంగ్రెస్ నాయకులతో మంతనాలు జరిపారు. కాపు/ కులస్ధుడైన ఆదికేశవులు నాయుడిని చిరంజీవి పార్టీలోకి ఆకర్షించేందుకు జరుగుతున్న ప్రయత్నాల్లో భాగంగా నేడు ఆయనకు, అల్లు అరవింద్ కు మధ్య సమావేశం జరిగింది.