చంద్రబాబుకు మరో షాక్

చంద్రబాబు నాయుడు ముఖ్యమంత్రిగా ఉన్న ఆ తొమ్మిదేళ్ళ కాలంలో ఆయనకు చీఫ్ పబ్లిక్ రిలేషన్స్ ఆఫీసర్ గా పనిచేసిన డాక్టర్ విజయ్ కుమార్ ముఖ్యమంత్రి రాజశేఖరరెడ్డిని కలుసుకోవడం విశేషం. విజయ్ కుమార్ చంద్రబాబు నాయుడికి అత్యంత సన్నిహితుడు. బాబుకు అంతర్జాతీయ ఖ్యాతిని తీసుకు రావడంలో విజయ్ కుమార్ కీలప పాత్ర పోషించారు. పత్రికల్లో బాబుకు అనుకూలమైన వార్తలను విజయ్ కుమార్ "ప్లాంట్" చేయించేవారు.

చంద్రబాబు వద్ద ఇప్పుడు ప్రైవేటు కార్యదర్శిగా ఆయన వ్యవహరిస్తున్నారు. ఆయన అకస్మాత్తుగా ముఖ్యమంత్రిని కలుసుకుని తనను ఆ పోస్టు నుంచి బదిలీ చేయమని కోరడం, అందుకు సిఎం అంగీకరించడం వెనుక హై డ్రామా నడిచినట్టు కనిపిస్తోంది. జర్నలిస్ట్ యూనియన్ నాయకుడు కె. శ్రీనివాసరెడ్డి విజయకుమార్ ను వెంటబెట్టుకుని వైఎస్ క్యాంపు కార్యాలయానికి తీసుకెళ్ళినట్టు తెలుస్తోంది.

చంద్రబాబు నాయుడు హయాంలో జరిగిన అనేక డీల్స్, ఆ రహస్యాలు విజయకుమార్ కు తెలుసు. జాయింట్ డైరెక్టర్ హోదా కలిగిన విజయకుమార్ కు మంచి పోస్టింగ్ ఇప్పించి ఆ రహస్యాలను బయటపెట్టించాలని వైఎస్ శిబిరం పథకం వేసి ఉంటుందని కొందరు తెలుగుదేశం నాయకులే అనుమానిస్తున్నారు.