చంద్రబాబు భయాలు

చంద్రబాబు నాయుడు మంచి పరిపాలనా దక్షుడైనా ఆయన స్వతహాగా విమర్శలకు భయపడే వ్యక్తి. అది ఒక నాయకుడికి సంబంధించినంత వరకు నైతికంగా మంచి విషయమే. చిరంజీవి పార్టీ వల్ల తెలుగుదేశం పార్టీకే ఎక్కువ నష్టం జరుగుతుందన్న అభిప్రాయం సర్వత్రా నెలకొన్న తరుణమిది. కాంగ్రెస్ నుంచి కాకుండా తెలుగుదేశం పార్టీ నుంచి చిరు పార్టీలోకి ఎక్కువగా వలసలు జరగడం, ఇంకా జరిగే సంకేతాలు కన్పించడం దీనికి కారణం కావచ్చు.

తమ్మినేని సీతారాం, అయ్యన్నపాత్రుడు వంటి ప్రముఖ తెలుగుదేశం నాయకులు కూడా చిరు పార్టీలోకి దూకడానికి సిద్ధం కావడం ఇప్పుడు రాజకీయ వర్గాల్లో ప్రధాన చర్చనీయాంశమైంది. చంద్రబాబు నాయుడు క్రమంగా తెలుగుదేశం పార్టీ బలపరచడంలో విఫలమవుతున్నారా? తెలుగుదేశం పార్టీలో చంద్రబాబు నాయుడే సుప్రీం కాబట్టి ఆయనకు వెన్నుపోటు పొడిచే సాహసం టిడిపి నాయకులు చేయలేరు. అంత సత్తా ఉన్న ఏకైక నాయకుడు దేవేందర్ గౌడ్ సొంత పార్టీ పెట్టుకోవడాన్ని బట్టి ఇతర టిడీపి నాయకులు నిద్రలో కూడా చంద్రబాబు అంటే భయపడుతున్నారు. చంద్రబాబు బానిసల్లాగే టిడీపిలో కొనసాగాలని కొందరు అనుకుంటూ ఉండగా, తమ్మినేని, అయ్యన్న పాత్రుడు వంటి అభిమాన ధనులు చిరంజీవి పార్టీలోకి జంప్ కావాలని ప్రయత్నిస్తున్నారు.