జగన్ వేరు కుంపటి?

దివంగత ముఖ్యమంత్రి డాక్టర్ వైయస్ రాజశేఖర రెడ్డి తనయుడు వైయస్ జగన్మోహన్ రెడ్డి కాంగ్రెసు పార్టీ అధిష్ఠాన వర్గంతో రాజీ పడేట్లు కనిపించడం లేదని రాజకీయ విశ్లేషకులు అంచనా వేస్తున్నారు. ఆయన కర్నూలు జిల్లాలోని నల్లుకాలువలో జరిగిన వైయస్ రాజశేఖర రెడ్డి సంస్మరణ సభలో నర్మగర్భంగా మాట్లాడిన తీరు ఈ విషయాన్ని స్పష్టం చేస్తోందని అంటున్నారు. వైయస్ రాజశేఖర రెడ్డి ఆశయాల సాధనకు తాను ప్రజలతో ఉంటానని ఆయన స్పష్టంగా చెప్పారు. తానే అన్నీ అయి వైయస్ రాజశేఖర రెడ్డి ఆశయాలను సాధిస్తానని చెప్పకనే చెప్పారు. వైయస్ మరణానంతరం షాక్ తో 660 మంది మరణించారని, వీరిలో కొందరు ఆత్మహత్యలు చేసుకున్నారని చెబుతూ వారందరినీ తాను పలుకరిస్తానని చెప్పారు. నేను మీలో ఒక్కడినని గుర్తుంచుకోండని ఆయన చెప్పారు. దీన్ని బట్టి ఆయన భవిష్యత్తు కార్యక్రమాన్ని రూపొందించుకున్నట్లు కూడా భావిస్తున్నారు. బాధిత కుటుంబాలను పరామర్శించే పేరుతో ఆయన రాష్ట్ర పర్యటనకు శ్రీకారం చుట్టవచ్చునని భావిస్తున్నారు.

పార్టీ అధిష్ఠాన వర్గం జాప్యాన్ని కూడా వైయస్ వర్గం సహించే స్థితిలో లేనట్లు కనిపిస్తోంది. శుక్రవారంనాడు కాకినాడ కాంగ్రెసు శాసనసభ్యుడు చంద్రశేఖర రెడ్డి మాట్లాడిన తీరు ఈ విషయాన్ని స్పష్టం చేస్తోంది. వారు ఘర్షణకు దిగడానికి సిద్ధంగా ఉన్నట్లు అనిపిస్తోంది. తెలుగు ప్రజల ఆత్మగౌరవాన్ని ఆయన ముందుకు తెచ్చారు. జగన్ వర్గాన్ని విమర్శించిన కాంగ్రెసు పార్లమెంటు సభ్యుడు హర్షకుమార్ పై జగన్ వర్గానికి చెందిన శాసనసభ్యులు బహిరంగంగానే విమర్శలు చేశారు. అయితే పార్టీ అధిష్ఠాన వర్గం పూనుకుని సిఎల్పీ సమావేశం ఏర్పాటు చేసేదాకా నిరీక్షిస్తారా, ఇంకా జాప్యం చేస్తే మరో మార్గం ఎంచుకుంటారా అనేది తేలడం లేదు. అయితే మూడు రాష్ట్రాల శాసనసభల ఎన్నికలు ముగిసే లోగా తమ బలాన్ని మరింతగా కూడగట్టుకునే ప్రయత్నాలు జగన్ వర్గం చేయవచ్చునని అంటున్నారు. తనను ముఖ్యమంత్రిని చేయకపోతే పార్టీని చీల్చడమే మార్గమని జగన్ తాను అనుకునే కన్నా ఆయన వర్గం అందుకు ఎక్కువగా ఒత్తిడి పెడుతున్నట్లు తెలుస్తోంది. వైయస్ వర్గం మాట్లాడే తీరు అదే రీతిలో ఉంది.