ఆంధ్రజ్యోతి టార్గెట్ వైయస్ జగన్

తాజా రాజకీయ పరిణామాలతో ఆంధ్రజ్యోతి దినపత్రిక పండుగ చేసుకుంటోంది. దివంగత నేత వైయస్ రాజశేఖర రెడ్డి హయాంలో జరిగిన అక్రమ లావాదేవీలపై వరుస కథనాలను ప్రచురిస్తోంది. గత నాలుగైదు రోజులుగా ఆ వార్తాకథనాలను ప్రచురిస్తోంది. ఇంకా కొనసాగిస్తోంది. వైయస్ రాజశేఖర రెడ్డి అధికారాన్ని అడ్డం పెట్టుకుని వైయస్ జగన్, కెవిపి రామచందర్ రావు ఎలా సొమ్మును కూడబెట్టారనేది ఆ వార్తాకథనాల ప్రధాన సారాంశం. 40 లక్షల రూపాయ వార్షికాదాయం గల వైయస్ జగన్ ఆరేళ్ల కాలంలో 40 కోట్ల వార్షికాదాయానికి చేరునే ఎత్తుకు ఎలా ఎదిగాడనే విషయాన్ని ప్రధానం చేసుకుని ఆంధ్రజ్యోతి దినపత్రిక శనివారం వార్తాకథనాన్ని ప్రచురించింది.

ఈ ఆదాయాన్ని పెంచుకోవడానికి వైయస్ అధికారాన్ని వైయస్ జగన్ ఎలా వాడుకున్నారనే విషయంపై సవివరమైన వార్తాకథనం అది. వైయస్ ప్రియమిత్రుడు కెవిపి రామచందర్ రావుకు, వైయస్ జగన్ కు మధ్య తగాదా ఎందుకు వచ్చిందనే విషయంపై కూడా ఆ పత్రిక ఓ వార్తాకథనాన్ని ప్రచురించబోతోంది. గతంలో ఈనాడు, ఆంధ్రజ్యోతి ప్రచురించిన వార్తాకథనాల సారాంశం కూడా అదే అయినప్పటికీ వైయస్ జగన్ పార్టీ పెట్టబోతున్న నేపథ్యంలో పకడ్బందీగా, పథకం ప్రకారం కొత్త విషయాలు చేర్చి ఆంధ్రజ్యోతి ఈ వార్తాకథనాలను ప్రచురిస్తోంది. ఆంధ్రజ్యోతి మేనేజింగ్ డైరెక్టర్ రాధాకృష్ణకు, వైయస్ జగన్ కు చాలా కాలంగా వైరం ఉంది. అవకాశం దొరికితే వైయస్ జగన్ పై విమర్శలకు, ఆరోపణలకు రాధాకృష్ణ తన పత్రికను వేదికగా మారుస్తున్నారనే అభిప్రాయం ఉంది.