కిరణ్‌కుమార్ రెడ్డికి బొత్స చెక్?

By Pratap

Published: Tuesday, June 7, 2011, 9:47 [IST]

ముల్లును ముల్లుతోనే తీయాలని అంటారు. అదే విధంగా ముఖ్యమంత్రి కిరణ్ కుమార్ రెడ్డి ఏకపక్ష ధోరణికి చెక్ పెట్టేందుకే ప్రదేశ్ కాంగ్రెసు కమిటీ (పిసిసి) అధ్యక్షుడిగా బొత్స సత్యనారాయణను నియమించారా అనే సందేహం తలెత్తుతోంది. కిరణ్ కుమార్ రెడ్డిపై వ్యంగ్యాస్త్రాలు విసురుతూ తనదైన రీతిలో అసంతృప్తిని వ్యక్తం చేస్తూ వచ్చిన బొత్స సత్యనారాయణకు తగిన అస్త్రమే దొరికిందని అంటున్నారు. కిరణ్ కుమార్ రెడ్డిని ఎప్పటికప్పుడు అదుపులో పెట్టేందుకు బొత్స సత్యనారాయణ పనికి వస్తారని కాంగ్రెసు అధిష్టానం భావించినట్లు చెబుతున్నారు.

వైయస్ రాజశేఖర రెడ్డికి పూర్తి స్వేచ్ఛనివ్వడం వల్ల తలెత్తిన సంక్షోభాన్ని దృష్టిలో పెట్టుకుని ముందు జాగ్రత్త చర్యగానే రెండో అధికార కేంద్రాన్ని ఏర్పాటు చేయడానికి బొత్స సత్యనారాయణను పిసిసి అధ్యక్షుడిగా నియమించినట్లు చెబుతున్నారు. ఏమైనా, బొత్స సత్యనారాయణ దూకుడుకు కిరణ్ కుమార్ రెడ్డి తట్టుకుంటారా అనేది వేచి చూడాల్సిందే.

Published On June 7, 2011