అక్కడ 'గాలి' వీస్తే, ఇక్కడ జగన్‌కు బలం

కర్ణాటకలోని బళ్లారి రూరల్ శాసనసభా నియోజకవర్గంలో గాలి జనార్దన్ రెడ్డి అనుచరుడు శ్రీరాములు విజయం వైయస్సార్ కాంగ్రెసు పార్టీ అధ్యక్షుడు వైయస్ జగన్‌కు ఆయుధంగా మారింది. అక్కడి గాలి వీస్తే ఇక్కడ జగన్‌కు బలం చేకూరింది. శ్రీరాములు విజయంతో జగన్ వర్గం శాసనసభ్యుల్లో అత్మవిశ్వాసం పెరిగిందని అంటున్నారు. కిరణ్ కుమార్ రెడ్డి ప్రభుత్వంపై తెలుగుదేశం పార్టీ ప్రతిపాదించిన అవిశ్వాసానికి మద్దతిస్తే తమపై అనర్హత వేటు పడి మధ్యంతర ఎన్నికలను ఎదుర్కోవాల్సి వస్తుందని భయపడుతూ వచ్చిన జగన్ ఎమ్మెల్యేలకు నమ్మకం కలిగిందని అంటున్నారు. ఆదివారం ఉదయం జగన్ ఏర్పాటు చేసిన సమావేశానికి 12 మంది శాసనసభ్యులే హాజరు కాగా, ఆ సంఖ్య మధ్యాహ్నానికి 19కి పెరిగింది.

శ్రీరాములు విజయం సాధించడంతో అవినీతి ఆరోపణలను ప్రజలను పట్టించుకోరని అర్థమైందని, జగన్‌పై వచ్చిన అవినీతి ఆరోపణలు మధ్యంతర ఎన్నికలను ఎదుర్కోవాల్సి వచ్చినా తమ విజయంపై ప్రభావం చూపబోవని వారు గుండె నిండా ఊపిరి పీల్చుకున్నారని అంటున్నారు. ప్రభుత్వాన్ని కూలగొట్టలేకపోయినా రైతు సమస్యలపై ప్రభుత్వంపై నిరసన వ్యక్తం చేస్తూ ప్రభుత్వానికి వ్యతిరేకంగా ఓటు చేయడం ద్వారా ప్రజల మనసులను గెలుచుకోవాలనే ఉద్దేశంతో జగన్ వర్గం ఎమ్మెల్యేలు ఉన్నారని అంటున్నారు.

English summary

The victory of Gali Janardhan Reddy's close aide B Sriramulu in Bellary bypoll has come as a shot in the arm for the beleaguered YSR Congress Party.