కెవిపిని సోనియా నమ్ముతారా?

By Pratap

Published: Monday, May 23, 2011, 10:11 [IST]

దివంగత నేత వైయస్ రాజశేఖర రెడ్డి ప్రియ మిత్రుడు కెవిపి రామచందర్ రావును కాంగ్రెసు అధ్యక్షురాలు సోనియా గాంధీ నమ్ముతారా అనే ప్రశ్న ఉదయిస్తోంది. కాంగ్రెసు అధిష్టానం రాష్ట్ర వ్యవహారాలను చక్కదిద్దే పనిలో పడింది. ఇందులో భాగంగా సమన్వయ కమిటీని ఏర్పాటు చేయాలని భావిస్తోంది. ఈ సమన్వయ కమిటీలో కెవిపి రామచందర్ రావుకు స్థానం దక్కుతుందా లేదా అనే ఆసక్తికరమైన విషయంగా మారింది. ప్రభుత్వానికి, పార్టీకి మధ్య సమన్వయానికి గతంలో అధిష్టానం ఓ సమన్వయ కమిటీని వేసింది.

అప్పటి సమన్వయ కమిటీలో కెవిపి రామచందర్ రావుతో పాటు ప్రస్తుత వైయస్సార్ కాంగ్రెసు పార్టీ అధ్యక్షుడు వైయస్ జగన్ కూడా ఉన్నారు. కానీ ఆ సమన్వయ కమిటీ పనిచేసిన పాపాన పోలేదు. ఇప్పుడు మరోసారి సమన్వయ కమిటీని వేయాలని కాంగ్రెసు అధిష్టానం భావిస్తున్నారు. సోనియా సూచనల మేరకే ఈ సమన్వయ కమిటీ ఉంటుందనే విషయం అందరికీ తెలిసిందే. ఇప్పుడు వేయబోయే సమన్వయ కమిటీలో కెవిపికి స్థానం దక్కుతుందా లేదా అనేది అనుమానంగా ఉంది. పైగా, ముఖ్యమంత్రి కిరణ్ కుమార్ రెడ్డికి కెవిపి మీద అంత మంచి అభిప్రాయం లేదు.

Published On May 23, 2011