చర్చించండి, నిజాలు తెలుస్తాయి: కిశోర్ చంద్రదేవ్ లేఖ

By Pratap

Published: Thursday, September 12, 2013, 8:38 [IST]

న్యూఢిల్లీ: సమైక్యాంధ్రను కోరుకుంటున్న ఎపి ఎన్జీవోలతో చర్చలు జరపాలని సీమాంధ్రకు చెందిన కేంద్ర మంత్రి కిశోర్ చంద్రదేవ్ కాంగ్రెసు అధిష్టానాన్ని కోరారు. ఆంధ్రప్రదేశ్‌లో నెలన్నర రోజులుగా పాలన స్తంభించిందని, గ్రామీణ ప్రాంతాలు సహా సీమాంధ్రలోని అన్ని ప్రాంతంల్లో ప్రజలు ఉద్యమిస్తున్నారని ఆయన అన్నారు. ప్రజల మనోభావాలను, మద్దతును ప్రతిబింబిస్తూ ఏపీఎన్‌జీవోలు హైదరాబాద్‌లో సభ నిర్వహించారని, ఈ నేపథ్యంలో వారితో చర్చలు జరిపితే వాస్తవాలు తెలుస్తాయని ఆయన అధిష్ఠానానికి సూచించారు.

ఈ మేరకు కాంగ్రెస్ పార్టీ ఉపాధ్యక్షుడు రాహుల్ గాంధీ, రాష్ట్ర వ్యవహారాల ఇన్‌ఛార్జి దిగ్విజయ్‌సింగ్, పార్టీ కమిటీకి నేతృత్వం వహిస్తున్న ఏకే ఆంటోనీ, కేంద్ర హోం శాఖ మంత్రి సుశీల్‌కుమార్ షిండేలకు ఆయన వేర్వేరుగా లేఖలు రాశారు. రాష్ట్ర విభజన జరిగితే తమకు జరిగే నష్టం, వేధింపులను నిరసిస్తూ ఆంధ్రా ప్రాంతంలోని ప్రజలంతా ఉద్యమిస్తున్నారని వెల్లడించారు. ఈ నేపథ్యంలోనే హైదరాబాద్‌లో లక్ష మందికి పైగా ఏపీఎన్‌జీవోలు సమావేశమై, భారీ సభ నిర్వహించారని వివరించారు.

స్థానిక ప్రజలతో ఎలాంటి ఘర్షణకు కానీ, ఎలాంటి వాగ్వాదానికి కానీ దిగకుండా, ఎలాంటి సమస్యలూ సృష్టించకుండా చాలా పద్ధతిగా సభ నిర్వహించారని తెలిపారు. ఈ సభలో ప్రసంగాలు కూడా ఉద్యోగులను రెచ్చగొట్టేలా కానీ, అవాస్తవాలను ప్రచారం చేసేలా కానీ లేవని, ఉద్యోగులంతా చాలా గౌరవంగా, వేషభాషల్లో చాలా పద్ధతిగా వ్యవహరించారని వివరించారు.

రాష్ట్ర ప్రభుత్వంలో అంతర్భాగమైన ఉద్యోగులు నిర్వహించిన ఆ సభ ఆంధ్ర ప్రాంత ప్రజలంతా వ్యక్తం చేస్తున్న మనోభావాలకు దర్పణం పట్టిందని తెలిపారు. ఈ నేపథ్యంలో మారిన పరిణామాలను గుర్తించి, ప్రజల్లో భారీగా మద్దతు కలిగిన ఈ వర్గం నాయకులు, ప్రతినిధులతో చర్చలు జరపాలని సూచించారు. క్షేత్రస్థాయి ప్రజల వాస్తవ మనోభావాలను తెలుసుకునేందుకు, శాంతియుతమైన పరిస్థితుల్ని నెలకొల్పేందుకు ఈ చర్చలు ఉపయోగపడతాయని వెల్లడించారు.

Published On September 12, 2013