జగద్గురు ఆది శంకరాచార్య అవతార పురుషుడా ? శివుని అంశనా ?

Updated: Thursday, May 9, 2019, 16:16 [IST]

డా.యం.ఎన్.చార్య - ప్రముఖ అంతర్జాతీయ జ్యోతిష పండితులు. హైదరాబాద్ - ఫోన్ : 9440611151

విశ్వకర్మ సమారంభం
శంకరాచార్య మధ్యమాం
అస్మదాచార్య పర్యంతాం
వందే గురుపరంపరాం .

శ్రీ శంకరాచార్యులు - అద్వైతం - సర్వ భౌతిక ప్రపంచానికి బ్రహ్మమే ఆధారం.శంకర భగవత్పాదులు జీవిత చరిత్ర చూస్తే ఆయన మానవపుతృుడే, కానీ అలాంటి మానవుడు, ధీశాలి మరొకరు ఈ చరిత్రలోనే మళ్లీ పుట్టలేదు అని తెలుస్తుంది ! ఆయన ఒక అవతార పురుషుడు, సాక్షాత్తూ శివస్వరూపం !!!!!!!

శ్రీ శంకరులు కేరళలో కాలడి అనే గ్రామములో నంబూద్రి కుటుంబములో శివగురువు, ఆర్యామ్బ దంపతులకు జన్మించారు. చిన్నతనంలోనే ఆయన తండ్రి మరణించగా, తల్లి ఆ బాలుడుకి ఐదో ఏట ఉపనయనం చేయించింది . ఆ తరువాత శంకరులు గోకర్ణ క్షేత్రానికి వెళ్ళి, మూడు సంవత్సరాలు సాంగోపాంగంగా వేదాలు నేర్చుకున్నారు. ఆయన ఏకసంథాగ్రాహి. ఆ చిన్న వయసులోనే అందరూ ఆ బాల శంకరుల ప్రతిభ చూసి, ఆయనని భగవంతుని అవతారమని భావించేవారు.

Shri Shankaracharya is - Advaita - Brahma

ఒకనాడు ఆయన ఒక ఇంటికి భిక్షకు వెళ్ళగా, ఆ ఇంటి పేద బ్రాహ్మణి ఇంట్లో ఏమీ లేక, ఒక ఎండిపోయిన ఉసిరి తీసుకుని వచ్చి, బాధతో సిగ్గుపడుతూ ఆ ఉసిరిని భిక్షగా వేసింది. ఆమె దారిద్ర్యం, ధర్మబద్ధతతో హృదయం కరిగి , శ్రీ శంకరులు ఆశువుగా "కనకధారాస్తవము" అనే మహోత్తరమైన స్తోత్రాన్ని కల్పించి ఆ అమ్మవారిని స్తుతించారు.

వెంటనే ఆ పేద బ్రాహ్మణి ఇంట, బంగారు ఉసిరికల వర్షం కురిసింది! అదే శంకరులు చేసిన తొలి స్తోత్రం..కనకధారా స్తోత్రం ! ఎనిమిదవ ఏటనే వేదాలలో పాండిత్యాన్ని సంపాదించి, పన్నెండవ ఏటికి సర్వ శాస్త్రాలను మధించి, పదహారో ఏటికి భాష్యాన్ని రాసి, ముప్పైరెండవ ఏటికి శరీరాన్ని విడిచిపెట్టేసారు.
ఆసేతు హిమాచలం భారతదేశము అంతా మత సంక్షోభములో ఉండగా అవతరించిన శివ స్వరూపము శంకరులు! ఆయన ఒక వ్యక్తి కాదు ! ఒక వ్యవస్థ .

అద్వైత తత్వాన్ని ప్రభోదించి ఈ దేశపుటెల్లలు దాటి అవతలకి పోయేట్టు నాస్తిక వాదులను తరిమి కొట్టారు.ఈ ఆధునిక వాహనాలు, రోడ్లు ఏమీ లేని రోజుల్లో కాశ్మీరం నుండి కన్యాకుమారి దాకా పర్యటించి ఈ జాతి జీవన విధానాన్ని మార్చిన మహనీయులు..మనపై కరుణతో ఆ శివుడు స్వయముగా దిగివచ్చిన అవతారం శంకర భగవత్పాదులు!

అద్వైతమతం ఆదిశంకరాచార్యులు:-

అద్వైతం అంటే రెండు కానిది. అంటే జీవుడికి, దేవుడికి భేదం లేదని చెప్పే మతమన్నమాట. ఈ సిద్ధాంతానికి రూపకర్త జగద్గురు శ్రీ ఆదిశంకరులు. కేరళలోని కాలడి అనే గ్రామంలో జన్మించిన ఆదిశంకరులు ప్రపంచమంతా జగద్గురువుగా గౌరవించే అత్యున్నతమైన ఆధ్యాత్మికవేత్త, మహాజ్ఞాని, మహాపండితులు. సౌందర్యలహరి, శివానందలహరి, వివేకచూడామణి, ప్రస్థాన త్రయభాష్యంతోబాటు ఈనాడు మనం స్తుతించుకునే అనేక స్తోత్రగంథాలు, ప్రకరణ గ్రంథాలు, కనకధారాస్తోత్రం, భజగోవింద శ్లోకాలు ఆయన రచించినవే. రవాణా సదుపాయాలు లేని రోజుల్లోనే ప్రపంచమంతా కాలినడకన పర్యటించి అన్ని మతాలను, విశ్వాసాలను ఒక తాటిపైకి తెచ్చిన ఈ జగద్గురువు భారతదేశంలో నాలుగు పీఠాలను స్థాపించారు.

బదరీనాథ్, పూరి, శృంగేరి, ద్వారకలలో వీరు స్థాపించిన ఈ పీఠాలకు బాధ్యతలు చేపట్టిన వారు కూడా వీరి నామంతోనే జగద్గురువులుగా ప్రఖ్యాతి చెందుతుండటం విశేషం. వీరి లెక్క ప్రకారం దేహమే దేవాలయం. దేహంలో ఉండే జీవుడే దేవుడు. భౌతికమైన దేహం నశించినా, ఆ దేహంలో ఉండే జీవుడు మాత్రం స్థిరంగా ఉంటాడని అద్వైతుల నమ్మకం. నిశ్చలమైన బుద్ధితో 'అహం బ్రహ్మాస్మి' అంటే నేనే బ్రహ్మను అని తెలుసుకునేవాడు జీవన్ముక్తుడు అవుతాడని అద్వైతులంటారు.

శ్రీ ఆదిశంకర విరచిత ప్రాతః స్మరణ స్తోత్రమ్ :-

ప్రాతః స్మరామి హృది సంస్ఫురదాత్మతత్త్వం సచ్చిత్సుఖం పరమహంసగతిం తురీయమ్ |

యత్స్వప్నజాగరసషుప్తమవైతి నిత్యం తద్బ్రహ్మ నిష్కలతమహం న చ భూతసంఘః || 1 ||

సచ్చిదానందరూపము , మహాయోగులకు శరణ్యము , మోక్షమునిచ్చునదీ అగు ప్రకాశవంతమైన ఆత్మతత్త్వమును ప్రాతఃకాలమునందు నామదిలో స్మరించుచున్నాను. ఏ బ్రహ్మస్వరూపము స్వప్నము , జాగరణ , సుషుప్తి అనువాటిని తెలుసుకొనుచున్నదో , నిత్యమూ , భేదము లేనిదీ అగు ఆ బ్రహ్మ నేనే. నేను పంచభూతముల సముదాయము కాదు.

ప్రాతర్భజామి మనసాం వచసామగమ్యం వాచో విభాంతి నిఖిలా యదనుగ్రహేణ |

యన్నేతినేతి వచనైర్నిగమా అవోచుః తం దేవదేవమజ మచ్యుతమాహురగ్ర్యమ్ || 2 ||

మనస్సునకు , మాటలకు అందని ఆ పరబ్రహ్మను ప్రాతఃకాలము నందు సేవించుచున్నాను. ఆయన అనుగ్రహము వల్లనే సమస్త వాక్కులు వెలుగొందుచున్నవి. వేదములు '"నేతి" "నేతి"(ఇది కాదు , ఇది కాదు)అను వచనములచే ఏ దేవుని గురించి చెప్పుచున్నవో , జనన మరణములు లేని ఆ దేవ దేవునే అన్నిటి కంటే గొప్పవాడుగా పండితులు చెప్పిరి.

ప్రాతర్నమామి తమసః పరమర్కవర్ణం పూర్ణం సనాతనపదం. పురుషోత్తమాఖ్యమ్ |

యస్మిన్నిదం జగదశేషమశేషమూర్తౌరజ్జ్వాం భుజంగమ ఇవ ప్రతిభాసితం వై || 3 ||

అజ్ఞానాంధకారము కంటే వేరుగా సూర్యుని వలే ప్రకాశించు పూర్ణస్వరూపుడు , సనాతనుడు , అగు పురుషోత్తముని ప్రాతఃకాలము నందు నమస్కరించుచున్నాను. అనంతస్వరూపుడగు ఆయన యందే ఈ జగత్తంతయూ తాడులో సర్పము వలే కనబడుచున్నది.

శ్లోకత్రయమిదం పుణ్యం లోకత్రయవిభూషణమ్ |

ప్రాతః కాలే పఠేద్యస్తు స గచ్ఛేత్పరమం పదమ్ ||

మూడు లోకములను అలంకరించునవి, పుణ్యకరములు అగు ఈ శ్లోకములను ఎవడైతే ప్రాతఃకాలము నందు పఠించునో వాడు మోక్షమును పొందును.

॥ ఇతి శ్రీ శంకరాచార్య కృతం ప్రాతఃస్మరణ స్తోత్రం సమ్పూర్ణమ్ ॥

ఇలాంటి పవిత్రమైన రోజున మనము అందరమూ ఆయన నామస్మరణ చేసుకుంటూ, ఆయన మనకి అందించిన అపూరూపమైన ఆస్తులు... శబ్ద సౌందర్యముతో కూడిన స్తోత్రాలు... పఠిస్తూ...హర హర శంకర జయ శంకర.

శ్రీ ఆదిశంకరాచార్య అష్టోత్తర శతనామావళి :-