ఆగ్నేయ దిశలో గేటు ఉందా? ప్రతికూలతలు, పరిహారాలు తెలుసుకోండి!
వాస్తు శాస్త్రంలో దిశలకు, వాటిని పరిపాలించే మూలకాలకు అత్యంత ప్రాధాన్యత ఉంది. ఇంటికి ఆగ్నేయ (South-East) దిశను 'అగ్ని మూల’ అని పిలుస్తారు. ఈ దిశకు అధిపతి అగ్ని దేవుడు, అలాగే పాలక గ్రహం శుక్రుడు. హిందూ సాంప్రదాయం మరియు వాస్తు నియామాల ప్రకారం, ఆగ్నేయ దిశ కేవలం వంటగది నిర్మాణానికి మాత్రమే ఉత్తమమైనదిగా పరిగణించబడుతుంది.
ఆగ్నేయదిశలో ఇంటి ఎంట్రన్స్ గేటు ఉంటే తీవ్ర వాస్తుదోషం
ఈ దిశలో ఇంటి ప్రధాన ద్వారం లేదా కాంపౌండ్ వాల్ గేటు ఉండటం తీవ్రమైన వాస్తు దోషంగా చెప్పబడుతుంది. ఇది ఇంట్లోని పంచభూతాల సమతుల్యతను దెబ్బతీసి, ప్రతికూల శక్తిని ఆహ్వానిస్తుంది.ఇంటికి ఆగ్నేయం వైపు గేటు లేదా సింహద్వారం ఉండటం వల్ల కుటుంబ సభ్యులు వివిధ రకాల సమస్యలను ఎదుర్కోవాల్సి వస్తుంది. ఆగ్నేయ దోషం వల్ల లక్ష్మీ కటాక్షం లోపిస్తుంది.
ఆర్ధిక ఇబ్బందులు, అనవసరపు ఖర్చులు, రోగాలు
వ్యాపారాలలో అకస్మాత్తుగా నష్టాలు రావడం, సంపాదనకు మించి అనవసర ఖర్చులు పెరగడం, ఎంత ప్రయత్నించినా అప్పుల ఊబి నుంచి బయటపడలేకపోవడం వంటి ఆర్థిక ఇబ్బందులు తలెత్తుతాయి.ఆగ్నేయ దిశ శుక్రుడి స్థానం కావడం వల్ల, ఇక్కడి దోషం ఇంట్లోని స్త్రీలపై తీవ్ర ప్రభావం చూపుతుంది. ముఖ్యంగా గృహిణి తరచూ హార్మోన్ల సమస్యలు, గర్భాశయ లోపాలు, అధిక అలసట మరియు మానసిక ఒత్తిడికి గురవుతుంది.
ఇంట్లో చిరాకులు, మానసిక అశాంతి
అగ్ని తత్వం పెరగడం వల్ల కుటుంబ సభ్యులలో ఓపిక నశిస్తుంది. చిన్న చిన్న విషయాలకే భార్యాభర్తల మధ్య గొడవలు, పిల్లలలో మొండితనం, కోపం మరియు ఇంట్లో ఎప్పుడూ ఒక రకమైన అశాంతి వాతావరణం నెలకొంటుంది. కోర్టు కేసులు లేదా చట్టపరమైన ఇబ్బందులు ఎదురయ్యే ప్రమాదం కూడా ఉంది.
ఈ పరిహారాలు చేస్తే ఉపశమనం
ఆగ్నేయం దిశలో గేటు మార్చటానికి వీలు లేని పరిస్థితిలో కొన్ని పరిహారాల ద్వారా ఆగ్నేయ దోష తీవ్రతను గణనీయంగా తగ్గించవచ్చు: ఆగ్నేయ ద్వార దోషాన్ని నివారించడంలో పిరమిడ్లు అద్భుతంగా పనిచేస్తాయి. ప్రధాన ద్వారం లేదా గేటుకు పైభాగంలో ఇరువైపులా రాగి, లేదా ఇత్తడితో చేసిన మూడు వాస్తు పిరమిడ్లను అమర్చాలి. ఇది నెగిటివ్ ఎనర్జీని ఫిల్టర్ చేస్తుంది.
రంగుల విషయంలో జాగ్రత్త
ఆగ్నేయ గేటుకు లేదా ప్రధాన ద్వారానికి ఎట్టి పరిస్థితుల్లోనూ ముదురు నీలం, నలుపు రంగులను వేయకూడదు. వీటికి బదులుగా అగ్ని మూలకాన్ని శాంతింపజేసే గులాబీ, లేత నారింజ, వెండి లేదా లేత గోధుమ రంగులను వేసుకోవటం మంచిది.ఇంట్లో ఆగ్నేయ దిశ ఎల్లప్పుడూ వాయువ్య (North-West) దిశ కంటే కాస్త బరువుగా ఉండేలా చూసుకోవాలి.
ఇలా చేస్తే ప్రతికూల శక్తుల నుండి విముక్తి
అలాగే ఆగ్నేయ గేటు బయట అంతర్గత గోడపై ఒక చిన్న సైజు ఎరుపు రంగు బల్బును రాత్రి పూట వెలిగించడం ద్వారా అగ్ని తత్వాన్ని సమం చేయవచ్చు.సింహద్వారం పైన రాగితో చేసిన ఓం, త్రిశూలం లేదా స్వస్తిక్ గుర్తులను ఉంచాలి. ఇవి ఇంటి చుట్టూ రక్షణ కవచంలా పనిచేస్తాయి. ద్వారానికి ఇరువైపులా రాతి ఉప్పు ఉంచడం వల్ల కూడా ప్రతికూల శక్తి ఇంట్లోకి ప్రవేశించకుండా నిరోధించవచ్చు.
Click it and Unblock the Notifications
Sign in with Google