ప్రేమ విఫలమై ఇంజనీర్ల ఆత్మహత్య

హైదరాబాద్‌ః ముక్కోణపు ప్రేమలో విఫలమైన ఇద్దరు సాఫ్ట్‌వేర్‌ ఇంజనీర్లు ఆత్మహత్యకు పాల్పడిన సంఘటన
హైదరాబాద్‌లో జరిగింది. రవి కుమార్‌(25), శ్రీనివాసచారి (25) అనే ఇద్దరు నల్లకుంటలోని ఒక సంస్థలో సాఫ్ట్‌వేర్‌ ఇంజనీర్లుగా పనిచేస్తున్నారు. వీరిద్దరు ఒకే గదిలో అద్దెకు వుంటున్నారు. మంచి మిత్రులు మాత్రమే కాకుండా వీరిద్దరూ సన్నిహిత బంధువులు కూడా అని తెలిసింది.

ఈ ఇద్దరు ఆదివారం నాడు తమ గదిలో పురుగుల మందు తాగి ఆత్మహత్య చేసుకున్నారు. పోలీసుల దర్యాప్తులో రెండు రకాల కథనాలు వినవస్తున్నాయి. ఈ ఇద్దరు ఒకే అమ్మాయిని ప్రేమించి ప్రేమలో విఫలమై ఆత్మహత్య చేసుకున్నట్టుగా తెలిసింది. అయితే మరో కథనం ప్రకారం ప్రేమలో రవికుమార్‌ విఫలమై ఆత్మహత్య చేసుకోవాలని నిర్ణయించగా రవి లేకుండా తాను బతకలేనని శ్రీనివాస్‌ కూడా ఆత్మహత్య చేసుకున్నాడని తెలిసింది. వీరి గదిలో ఒక అమ్మాయి ప్రేమలేఖ దొరికినట్టుగా పోలీసులు చెప్పారు.