పేర్వారం పోలీసు సంస్కరణలు

హైదరాబాద్‌ః పోలీసు శాఖలో పెద్ద ఎత్తున సంస్కరణలు చేపట్టనున్నట్టుగా కొత్త డిజిపి పేర్వారం రాములు ప్రకటించారు. హైదరాబాద్‌ నగర పోలీసు కమిషనర్‌గా వున్న సమయంలో చేపట్టిన సంస్కరణలను రాష్ట్రంలోని అన్ని ప్రాంతాలకు విస్తరించనున్నట్టుగా ఆయన వెల్లడించారు. పుట్టపర్తి సాయిబాబా ఆశ్రమంలో గతంలో జరిగిన నలుగురు యువకుల వివాదాస్పద హత్యలకు సంబంధించిన కేసును అవసరమైతే మళ్లీ తెరుస్తామని ఆయన చెప్పారు.

కృషి బ్యాంకు కేసును కూడా తిరిగి తోడనున్నట్టుగా ఆయన చెప్పారు. కానిస్టేబుల్‌ స్థాయి ఉద్యోగిని పూర్తి స్థాయి దర్యాప్తు అధికారిగా తీర్చిదిద్దాలన్నది తమ ఆకాంక్ష అని ఆయన చెప్పారు. అందుకు అనుగుణంగా సమగ్రమైన చర్యలు తీసుకోనున్నట్టుగా ఆయన చెప్పారు. కానిస్టేబుల్స్‌ను సమగ్రమైన దర్యాప్తు అధికారులుగా తీర్చిదిద్దడానికి వీలుగా అవసరమైన శిక్షణ ఇప్పించనున్నట్టుగా ఆయన చెప్పారు. నేరస్తులతో సంబంధాలు వున్న పోలీసు ఉద్యోగులపై కఠిన చర్యలు తీసుకోనున్నట్టుగా ఆయన వెల్లడించారు. సంఘవిద్రోహులతో స్నేహం వున్నట్టుగా ఆరోపణలు వున్న అధికారుల వ్యవహారంపై దర్యాప్తు జరిపించనున్నట్టుగా రాములు చెప్పారు.