జింబాబ్వేతో సిరీస్‌ భారత్‌కైవసం

న్యూఢిల్లీః జింబాబ్వేతో జరుగుతున్న రెండో టెస్ట్‌ మాచ్‌లో భారత్‌ నాలుగు వికెట్ల తేడాతో ఘన విజయం సాధించింది. ఈ విజయంతో 2-0 తేడాతో సిరీస్‌ భారత్‌ కైవసం అయింది. ఈ మాచ్‌లో భారత్‌ విజయానికి బాటలు వేసిన హర్భజన్‌సింగ్‌కు మాన్‌ ఆఫ్‌ మాచ్‌, అనిల్‌కుంబ్లేకు మాన్‌ ఆఫ్‌ సిరీస్‌ దక్కాయి.

రెండో టెస్ట్‌ సెకండ్‌ ఇన్నింగ్స్‌లో భారత్‌ స్పిన్నర్ల ధాటికి జింబాబ్వే బ్యాటింగ్‌ ఆర్డర్‌ ఆదివారం నాడు 146 పరుగులకే కుప్పకూలడంతో ఆదివారం నాడు రెండో ఇన్నింగ్స్‌ను ప్రారంభించిన భారత్‌ సాయంత్రం ఆటముగిసే సమయానికి మూడువికెట్ల నష్టానికి 36 పరుగులు చేసింది. 123 పరుగులవిజయలక్ష్యాన్ని సోమవారం ఆట ఆఖరు రోజులోగా భారత్‌ సాధించాల్సివుండటంతో ఆట ఆరంభంతోనే తీవ్ర ఉత్కంఠ మొదలయింది. ఆట ప్రారంభించిన భారత్‌ జాగ్రత్తగా ఆడుతూ మరో నాలుగువికెట్లు వుండగానే లక్ష్యాన్ని సాధించింది. సచిన్‌, ఎస్‌ఎస్‌ దాస్‌ ధాటిగా ఆడుతూ క్రితం రోజు స్కోర్‌కు మరో 57 పరుగులు జోడించారు. ఈ దశల జింబాబ్వేలెఫ్ట్‌ హాండ్‌ స్పిన్నర్‌ రేమాండ్‌ ప్రైస్‌ను రంగంలోకి దించింది. 42 పరుగుల వ్యక్తి గత స్కోర్‌ వద్ద ప్రైస్‌ బౌలింగ్‌లో సచిన్‌ ఎల్‌బిడబ్లు అయ్యారు. సచిన్‌ స్థానంలో వచ్చిన రాహుల్‌ ద్రవిడ్‌ దాస్‌తో కలసి నెమ్మదిగా ఆడుతూ స్కోర్‌ను 103 పరుగులకు తెచ్చిన సమయంలో దాసు హీత్‌స్ట్రీక్‌ బౌలింగ్‌లో ఎల్‌బిడబ్లు అయ్యారు. అప్పటివరకు గెలుపు అనాయాసమనుకున్న భారత్‌ జట్టులో ఒక్కసారిగా కలవరం ప్రారంభమయింది.విజయానికి కేవలం 19 పరుగుల దూరంలో రాహుల్‌ ద్రావిడ్‌ ప్రైస్‌ బౌలింగ్‌లో ఫ్లవర్‌ క్యాచ్‌ పట్టడంతోపెవిలియన్‌ దారి పట్టారు. ఈ దశలో భారత జట్టులోవిజయంపై భయాలు కూడా తలెత్తాయి.అనూహ్యంగావిజయం జింబాబ్వే పరం అవుతుందా అన్న అనుమానాలు తలెత్తాయి. గతంలో వెస్టిండిస్‌తో కేవలం 120 పరుగుల లక్ష్యంతో ఆటమొదలుపెట్టివిజయానికి రెండు పరుగుల దూరంలో చేతులెత్తిసిన చేదు అనుభవం భారత ఆటగాళ్ల మదిలో మెదిలింది. బాధ్యతాయుతమైన బౌలింగ్‌తో జింబాబ్వే ఆటగాళ్లను కంగుతినిపించిన హర్భజన్‌సింగే ఈ సారి కూడా భారత్‌ను ఆదుకున్నారు. హర్భజన్‌ బ్యాటింగ్‌అంతా ఉత్కంఠ నెలకొంది. చివరకు సిక్సర్‌తో విజయాన్ని భారత్‌కు దఖలు చేసిన హర్భజన్‌ మ్యాన్‌ ఆఫ్‌ మాచ్‌గా నిలిచారు.