కృషి డైరెక్టర్‌ సునీతఅరెస్టు

విజయవాడః గత ఆరునెల్లుగా పోలీసుల కనుగప్పి తిరుగుతున్న కృషి బ్యాంక్‌ చైర్మన్‌ సోదరి, బాంకు డైరెక్టర్లలో ఒకరైన కొసరాజు సునీత(28) ఎట్టకేలకు పట్టుబడ్డారు. పోలీసులు, యాంటీ గూండా స్క్వాడ్‌ అధికారులు ఆమెను అరెస్టు చేశారు. కృషి బ్యాంకు కుంభకోణం బయటపడిన తర్వాత నాలుగు నెలలపాటు బెంగుళూరు, తిరుపతి, చెన్నై తదితర పట్టణాలు చుట్టి వచ్చిన సునీత గత రెండు నెలలుగా మాత్రం విజయవాడలోనే దూరపు బంధువు సాయంతో తలదాచుకుంటున్నది.

విద్యాధరపురం ఆర్టీసీ డిపోలో మెకానిక్‌గా పనిచేస్తున్న కొసరాజు చంద్రశేఖర్‌ ఆజాద్‌ అనే వ్యక్తి సునీత కోసం ప్రత్యేకంగా ఒక ఫ్లాట్‌ను అద్దెకు తీసుకుని తనకు తోడుగా ఒక మహిళను ఉంచి ఆశ్రయం కల్పించారు. తొలుత తన సోదరుని బలవంతంపై తాను బ్యాంకు డైరెక్టర్‌గా వున్నానని బ్యాంకు వ్యవహారాలతో తనకేలాంటి సంబంధం లేదని చెప్పిన సునీత తర్వాత ఇంటరాగేషన్‌లో బ్యాంకు నుంచి 20 లక్షల రూపాయల రుణం తీసుకున్నవిషయం అంగీకరించారు. 1991లో వివాహమైన సునీత 1999లో విడాకులు తీసుకున్నారు. తర్వాత నుంచి తన కుమారునితో కలసి బంజారాహిల్స్‌లో నివసిస్తున్నారు. కృషి కేసుకు సంబంధించి ఇప్పటివరకు అధికారులు 17 మందినిఅరెస్టు చేయడంతో పాటు 19 కోట్ల రూపాయల విలువైన ఆస్తులనుస్వాధీనం చేసుకున్నారు. మొత్తం 32 కోట్ల రూపాయల మేర కృషి బ్యాంకు జనాలను ముంచింది. చైర్మన్‌ కొసరాజు వెంకటేశ్వరరావు కోసం గాలింపు జరిపిన పోలీసులు చాలా రోజుల తర్వాత అతడు లండన్‌ పారిపోయినట్టుగా ప్రకటించింది.