ఇక రోజూ అయోధ్యకేసువిచారణ

లక్నోః అయోధ్య కేసుకు వున్న ప్రాధాన్యత దృష్ట్యా ఆ కేసును ప్రత్యేక కమిషన్‌ ద్వారా రోజూవిచారించేందుకు అలహాబాద్‌ హైకోర్టు అంగీకరించింది. అయోధ్యవివాదం నానాటికీ తీవ్రం అవుతున్న దరిమిలాకేసుపై రోజువారీ విచారణ చేపట్టి త్వరితగతిన తీర్పు చెప్పాల్సిందిగా కేంద్ర ప్రభుత్వం అలహాబాద్‌ హైకోర్టుకువిజ్ఞప్తి చేసింది. ఈ విజ్ఞప్తిని కోర్టు బుధవారం పరిశీలించింది.

అయోధ్యకేసుపై ఒక ప్రత్యేక కమిషన్‌ సాక్ష్యాధారాలను రికార్డు చేసుకుంటుందని న్యాయస్థానం ఈ సందర్భంగా ప్రకటించింది. న్యాయమూర్తుల కొరతవున్నప్పటికీ రోజూవిచారణ జరిగితీరుతుందని కోర్టు స్పష్టం చేసింది. ఒక వేళ సాక్షులు కోర్టుకు వచ్చి సాక్ష్యాలు ఇవ్వకపోతే కమిషన్‌ ప్రతినిధులుస్వయంగా వెళ్ళి సాక్ష్యాధారాలు నమోదు చేసుకుంటారని కూడా కోర్టు చెప్పింది.

రోజువారీ విచారణ జరిపినప్పటికీ ఈ కేసు తేలేందుకు మరో రెండేళ్ళు పడుతుందనిఅంచనా. అయోధ్య కేసుపై రోజువారీ విచారణ జరిపితే తమకు అభ్యంతరం లేదని సున్నీ వక్ఫ్‌ బోర్డు అధ్యక్షుడు జిలానీ చెప్పారు. రోజూవిచారణ జరిపితేనే మరో ఏడాదిన్నర సాక్ష్యాల నమోదుకే పడుతుంది. మరో నాలుగునెలలు తుది తీర్పు వెలువరించేందుకు పడుతుందని జిలానీ అభిప్రాయపడ్డారు.