క్రాఫ్ట్‌, డ్రాయింగ్‌ టీచర్ల భర్తీకి చర్యలు

హైదరాబాద్‌: రాష్ట్రంలోని పాఠశాలల్లో ఖాళీగా ఉన్న డ్రాయింగ్‌, డ్రిల్లు, క్రాఫ్ట్‌ టీచర్ల పోస్టులను భర్తీ చేస్తామని భారీ నీటి పారుదల శాఖ మంత్రి కడియం శ్రీహరి చెప్పారు. పాఠశాలవిద్యా మంత్రి మండవ వెంకటేశ్వర రావు తరఫున ఆయన గురువారం శాసనసభలో సభ్యులు వేసిన ప్రశ్నలకు సమాధానమిచ్చారు.

రెగ్యులర్‌ డిఎస్‌సి ద్వారా గానీ, ప్రత్యేకంగా గానీ ఈ పోస్టులను భర్తీ చేయనున్నట్లు ఆయన తెలిపారు. పాఠశాలల్లో క్రాఫ్ట్‌ టీచర్ల ఖాళీలు వేయి, డ్రాయింగ్‌ టీచర్ల ఖాళీలు 600 ఉన్నాయని ఆయన చెప్పారు. పాఠశాలల్లో ఉన్న క్రాఫ్ట్‌, డ్రిల్లు టీచర్ల ఖాళీలను 1989 నుంచి భర్తీ చేయలేదని ఎన్‌. ఇంద్రసేనా రెడ్డి (బిజెపి) ప్రభుత్వ దృష్టికి తెచ్చారు. డిఎస్‌సి ద్వారా భర్తీ కాని ఎస్‌సి, ఎస్‌టి, బిసి పోస్టుల భర్తీకి ప్రత్యేక డిఎస్‌సి నిర్వహిస్తామని మంత్రి చెప్పారు.