దత్‌ పై హిందీస్టార్‌ సాక్ష్యం!

ముంబయ్‌ః బాలీవుడ్‌ కు చెందిన సినీ ప్రముఖుడు ఒకరు ముంబయ్‌ పేలుళ్ళతో సంజయ్‌ దత్‌ కు గల సంబంధంపై సంచలన విషయాలను వెల్లడించనున్నారు. ఈ వ్యక్తి పేరును మాత్రం కోర్టు బయటపెట్టలేదు. 1993 ముంబయ్‌ బాంబు పేలుళ్ళ కేసుతో సంజయ్‌ దత్‌ కు సంబంధం వున్నదని, మాఫియా ముఠాలతో ఆయనకు సంబంధం వున్నదంటూ ఆయనపై టాడా కేసు నమోదైన విషయం విదితమే.

ఆ సినీ ప్రముఖుడికి ప్రాణభయం వుంటుందనే ఉద్దేశ్యంతో ఆయనపేరు వెల్లడించేందుకు ప్రత్యేక కోర్టు నిరాకరించింది. ఆయనను కోర్టుకు వచ్చి సాక్ష్యం చెప్పాల్సిందిగా ప్రత్యేక కోర్టు న్యాయమూర్తి కోడె గత నెల 24న సమన్లు జారీ చేశారు. సంజయ్‌ దత్‌ కు బాంబుపేలుళ్ళతో సంబంధం వున్నదంటూ ఈ సినీ ప్రముఖుడు గతంలో అఫిడవిట్‌ దాఖలు చేశారు. ఈ సినీ ప్రముఖుడు సోమవారం నాడే ప్రత్యేక కోర్టు ఎదుటహాజరు కానున్నారు.