తెలంగాణ బిల్లుకు మద్దతు: వెంకయ్య

హైదరాబాద్: పార్లమెంటులో తెలంగాణ బిల్లు ప్రతిపాదిస్తే తాము మద్దతిస్తామని భారతీయ జనతా పార్టీ (బిజెపి) సీనియర్ నాయకుడు ఎం. వెంకయ్యనాయుడు చెప్పారు. తెలంగాణపై కాంగ్రెస్ తన వైఖరిని స్పష్టం చేయాలని ఆయన శుక్రవారం మీడియా ప్రతినిధుల సమావేశంలో డిమాండ్ చేశారు. కాంగ్రెస్ అధ్యక్షురాలు సోనియాగాంధీ, ప్రధాని, కేంద్ర ప్రభుత్వం తెలంగాణపై తమ తమ వైఖరులను స్పష్టం చేయాల్సిన అవసరం ఉందని ఆయన అన్నారు. సమైక్య రాష్ట్రాన్నే కోరుకుంటున్నట్లయితే ఆ విషయాన్నైనా స్పష్టం చేయాలని ఆయన అన్నారు.

తెలంగాణపై కావాలనే కాంగ్రెస్ కాలయాపన చేస్తోందని ఆయన విమర్శించారు. తాము రెండో ఎస్సార్సీ వేస్తామని కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ అంటున్నారని, రెండో ఎస్సార్సీ వేస్తున్నట్లు వచ్చిన వార్తలను ప్రధాని కార్యాలయం ఖండించిందని, ఈ విధమైన ముసుగులో గుద్దులాట మంచిది కాదని ఆయన అన్నారు.