చెప్పాల్సింది మొయిలీ కాదు: ఎమ్మెస్సార్

హైదరాబాద్: తెలంగాణపై నిర్ణయం ప్రకటించేది తమ పార్టీ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ కాదని, కేంద్ర ప్రభుత్వం నిర్ణయం తీసుకోవాల్సి ఉంటుందని మాజీ మంత్రి, కాంగ్రెస్ సీనియర్ శాసనసభ్యుడు ఎం. సత్యనారాయణరావు అన్నారు. రెండో ఎస్సార్సీ వేస్తున్నట్లు వస్తున్న వార్తలు, వీరప్ప మొయిలీ ప్రకటన ఊహాజనితాలేనని, అందువల్ల వీరప్ప మొయిలీ ప్రకటనపై మాట్లాడాల్సిన అవసరం లేదని ఆయన శుక్రవారం మీడియా ప్రతినిధులతో అన్నారు.

రెండో ఎస్సార్సీ వేస్తే తెలంగాణలో పార్టీకి తీవ్ర నష్టం కలుగుతుందని, ప్రజలు నమ్మరని తాము వీరప్ప మొయిలీకి చెప్పామని, ఈ విషయాన్ని సోనియాకు చెప్తానని మొయిలీ తమతో అన్నారని ఆయన వివరించారు. రెండో ఎస్సార్సీ వేస్తున్నట్లు వచ్చిన వార్తలను ప్రధాని కార్యాలయం ఖండించిందని, అందువల్ల అయోమయంలో దానికి కట్టుబడకూడదని ఆయన అన్నారు. తెలంగాణపై ప్రభుత్వం ప్రకటన చేసేవరకు తానేమీ చెప్పలేనని ఆయన అన్నారు.