ఆర్ట్స్ కాలేజీపైన విద్యార్థుల ఆందోళన

హైదరాబాద్: సబ్ ఇన్సెపెక్టర్ (ఎస్సై) పోస్టులకు వయోపరిమితిని పెంచాలని డిమాండ్ చేస్తూ విద్యార్థులు శుక్రవారం ఉస్మానియా విశ్వవిద్యాలయంలోని ఆర్ట్ర్ కళాశాలపైకి ఎక్కి కిందికి దూకి ఆత్మహత్య చేసుకుంటామని బెదిరిస్తున్నారు. దీంతో ఉస్మానియా విశ్వవిద్యాలయంలో ఉద్రిక్త వాతావరణం నెలకొంది. దాదాపు 30 మంది విద్యార్థులు కళాశాలపైకి ఎక్కి నిరసన వ్యక్తం చేస్తున్నారు. ఎస్పై పోస్టులకు వయోపరిమితిని 25 ఏళ్ల నుంచి 30 ఏళ్లకు పెంచాలని వారు డిమాండ్ చేస్తున్నారు. తమ డిమాండు పరిష్కరణకు విద్యార్థులు శుక్రవారం మధ్యాహ్నం ఒంటి గంట వరకు గడువు పెట్టారు. విశ్యవిద్యాలయంలో బంద్ పాటిస్తున్నారు.

ఎస్సై పోస్టులకు 28 ఏళ్లు ఉన్న వయోపరిమితిని 25 ఏళ్లకు తగ్గించారని, అయితే దాన్ని 30 ఏళ్లకు పెంచాలని తాము ముఖ్యమంత్రి డాక్టర్ వైయస్ రాజశేఖర రెడ్డిని కలిసి కోరామని, అయితా ఏ విధమైన చర్యలు తీసుకోలేదని విద్యార్థులు అంటున్నారు. ఆర్ట్స్ కళాశాల చుట్టూ పోలీసులు మోహరించారు. విద్యార్థులను శాంతింపజేసేందుకు వారు ప్రయత్నిస్తున్నారు. 1750 ఎస్సై పోస్టుల భర్తీకి ప్రభుత్వం తాజాగా నోటిఫికేషన్ జారీ చేసింది. విద్యార్థులకు తెలంగాణ రాష్ట్ర సమితి నాయకుడు నాయని నర్సింహారెడ్డి మద్దతు తెలియజేశారు.