బాబుపై యూత్ కాంగ్రెస్ ధర్నా

హైదరాబాద్: శాసనసభ డిప్యూటీ స్పీకర్ కుతూహలమ్మను తెలుగుదేశం పార్టీ అధ్యక్షుడు నారా చంద్రబాబునాయుడు అవమానించారని ఆరోపిస్తూ యూత్ కాంగ్రెస్, దళిత ఐక్య వేదిక కార్యకర్తలు శుక్రవారం ఎన్టీఆర్ ట్రస్టు భవన్ వద్ద ధర్నాకు దిగారు. చంద్రబాబుకు వ్యతిరేకంగా నినాదాలు చేస్తూ వారు లోనికి చొచ్చుకుపోవడానికి ప్రయత్నించారు. దాంతో వారిని పోలీసులు అరెస్టు చేశారు. డాక్టర్ అంబేడ్కర్ విగ్రహానికి చంద్రబాబు క్షీరాభిషేకం చేసి ప్రాయశ్చిత్తం చేసుకోవాలని వారు డిమాండ్ చేశారు.

ఇదిలా వుంటే, కుతూహలమ్మను ఆర్థిక మంత్రి కె. రోశయ్యనే అవమానించారని ఆరోపిస్తూ తెలుగుదేశం ఎస్సీ సెల్ నాయకులు ఆందోళనకు దిగారు. రోశయ్యపై చర్యలు తీసుకోవాలని కోరుతూ వారు స్పీకర్ కె.ఆర్. సురేష్ రెడ్డికి వినతిపత్రం సమర్పించడానికి ఆయన కార్యాలయానికి వచ్చారు. అయితే స్పీకర్ అందుబాటులో లేరు. దీంతో ఉన్నతాధికారికి వినతిపత్రం సమర్పించారు. తాము వస్తామని తెలిసి స్పీకర్ అందుబాటులో లేకుండా పోయారని, ఇది దళితులను అవమానించడమేనని వారు విమర్శించారు.