వైయస్ పాలనలో దోపిడీ: బాబు

గుంటూరు: ముఖ్యమంత్రి వైయస్ రాజశేఖర రెడ్డి పాలన దోపిడీకి మారు పేరుగా మారిందని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శించారు. తమ పార్టీ అధికారంలోకి రాగానే ప్రజల కష్టాలు తీరుతాయని ఆయన చెప్పారు. ఆయన మంగళవారం గుంటూరు జిల్లాలో పర్యటించారు. సంస్కరణలకు తాను వ్యతిరేకం కాదని, సంస్కరణలతో తాము సంపదను సృష్టిస్తే ప్రస్తుత ప్రభుత్వం దుర్వినియోగం చేస్తోందని ఆయన విమర్శించారు. ముఖ్యమంత్రి ఇడుపులపాయకే ప్రాధాన్యం ఇస్తున్నారని ఆయన విమర్శించారు.

సన్న, చిన్నకారు రైతుల రుణాలను మాఫీ చేయాల్సి ఉందని ఆయన చెప్పారు. గుంటూరు మిర్చియార్డు ప్రమాదం విషయంలో ముఖ్యమంత్రి, అధికారులు పొంతనలేని ప్రకటనలు చేస్తున్నారని ఆయన విమర్శించారు. ప్రస్తుత అభివృద్ధి రేటు కృత్రిమమేనని ఆయన విమర్శించారు. రాష్ట్రంలో సాగునీటి ప్రాజెక్టులు ముందుకు కదలడం లేదని ఆయన అన్నారు. గోదావరి జలాల వినియోగ అథారిటీని ఏర్పాటు చేసింది తమ ప్రభుత్వమేనని ఆయన చెప్పారు. షేర్ మార్కట్ పడిపోతే ఆందోళన వ్యక్తం చేసిన ప్రధాని మన్మోహన్ సింగ్ సరుకుల ధరలు పెరిగితే నిమ్మకు నీరెత్తినట్లు వ్యవహరిస్తున్నారని ఆయన అన్నారు. ప్రణాళికా సంఘంపై కూడా విమర్శలు చేశారు.