అయేషా హత్య కేసు ఛేదిస్తాం: జానా

హైదరాబాద్: విజయవాడ వసతిగృహంలో విద్యార్థిని అయేషా హత్య కేసులో కీలకమైన ఆధారాలు లభించాయని, త్వరలోనే కేసును ఛేదిస్తామని హోంమంత్రి కె. జానారెడ్డి చెప్పారు. ఉప ఎన్నికల సందర్భంగా భద్రతా ఏర్పాట్లపై ఆయన మంగళవారం ఉన్నతాధికారులతో సమీక్షించారు. రాష్ట్రంలో నేరాలు తగ్గుముఖం పట్టాయని ఆయన చెప్పారు. నక్సల్స్ ను, ఉగ్రవాదులను అదుపు చేయగలిగామని ఆయన చెప్పారు. ఉప ఎన్నికల్లో గట్టి బందోబస్తు ఏర్పాట్లు చేస్తామని ఆయన అన్నారు. కేంద్రం నుంచి అదనపు బలగాలను కోరుతున్నట్లు ఆయన తెలిపారు.

అయేషా హత్య కేసులో తన కుమారుడు అమాయకుడని పోలీసుల అదుపులో ఉన్న ఉపేంద్ర తల్లి లక్ష్మీబాయి అంటోంది. ఆమె మానవ హక్కుల కమీషన్ ను ఆశ్రయించారు. తన కుమారుడిని వెంటనే కోర్టులో హాజరు పరచాలని ఆమె విజ్ఞప్తి చేసింది. కేసు విచారణను మానవ హక్కుల కమీషన్ రేపటికి వాయిదా వేసింది. గుర్విందర్ సింగ్ అలియాస్ లడ్డూతో తన కుమారుడికి సంబంధాలు లేవని, నాలుగేళ్లుగా తన కుమారుడు లడ్డూకు దూరంగా ఉంటున్నాడని ఆమె చెప్పారు. 1998 నుంచి 2000 వరకు మాత్రమే ఉపేంద్ర లడ్డూతో ఉన్నాడని, ఆ తర్వాత దూరంగా ఉంటూ వస్తున్నాడని, అయితే ఏది జరిగినా తన కొడుకును పోలీసులు తీసికెళ్లే వారని, దీంతో అతన్ని 2004లో జగిత్యాలకు పంపానని ఆమె చెబుతోంది.