కర్ణాటకలో కాంగ్రెసే బెట్టర్: వైయస్

బెంగుళూర్: కాంగ్రెస్ పాలనలో కర్ణాటక ఆకర్షణీయంగా ఉండేదని ఆంధ్రప్రదేశ్ ముఖ్యమంత్రి డాక్టర్ వైయస్ రాజశేఖర రెడ్డి అన్నారు. స్థిరమైన ప్రభుత్వం లేనందు వల్లనే కర్ణాటకలో అభివృద్ధి సరిగా జరగడం లేదని ఆయన అన్నారు. బెంగుళూర్, మరికొన్ని నియోజకవర్గాల్లో కాంగ్రెసు తరఫున ఎన్నికల ప్రచారం చేయడానికి ఇక్కడికి వచ్చిన ఆయన మంగళవారం మీట్ ది ప్రెస్ కార్యక్రమంలో మాట్లాడారు. తమ రాష్ట్రంలో స్థిరమైన ప్రభుత్వం ఉండడం వల్ల అంతర్జాతీయ విమానాశ్రయాన్ని గడువుకన్నా ముందే నిర్మించగలిగామని, కర్ణాటకలో అస్థిరత వల్ల విమానాశ్రయం పూర్తి కాలేదని ఆయన అన్నారు.

కాంగ్రెస్ ఎన్నికల్లో ఇచ్చిన హామీలను అమలు చేస్తుందని, తమ పార్టీ అధ్యక్షురాలు సోనియాగాంధీ హామీల అమలు పట్ల ప్రత్యేక శ్రద్ధ చూపుతున్నారని ఆయన అన్నారు. తాము ఎన్నికల్లో ఇచ్చిన హామీ మేరకు రైతులకు ఉచిత విద్యుత్తును అందిస్తున్నామని, యూనిట్ విద్యుత్తును 8,9 రూపాయలకు కొని 25 లక్షల మంది రైతులకు ఉచితంగా ఇస్తున్నామని ఆయన చెప్పారు. రెండు రూపాయలకు కిలో బియ్యం పథకాన్ని విజయవంతంగా అమలు చేస్తామని ఆయన అన్నారు. ప్రచారానంతరం ఆయన రేపు (బుధవారం) హైదరాబాద్ తిరిగి వెళ్తారు.