మెగా పార్టీ ఆఫీసుకు భూమి పూజ

హైదరాబాద్: మెగాస్టార్ చిరంజీవి పార్టీ కార్యాలయ భవన నిర్మాణానికి పనులు చురుగ్గా జరుగుతున్నాయి. అంబేద్కర్ యూనివర్శిటీ ఉన్న జూబ్లీహిల్స్‌లోని రోడ్ నెంబర్ 48లో ఈ భవనం నిర్మాణమవుతోంది. ఇదే రోడ్డులో దాసరి నారాయణరావు నివాసముంటున్నారు. కార్యాలయ భవన నిర్మాణం కోసం చిరంజీవి దంపతులు ఇటీవల భూమిపూజ చేసినట్లు తెలుస్తోంది. ప్రస్తుతం పునాది పనులు జరుగుతున్నాయి. తాత్కాలికంగా ఒక షెడ్డును నిర్మించారు. ఈ భవన నిర్మాణాన్ని మూడు నెలల్లో పూర్తి చేయడానికి ప్రణాళిక సిద్ధమైంది.

చిరంజీవి నోరువిప్పి చెప్పకపోయినా ఆయన చేపడుతున్న చర్యలు, ఆయన కలుస్తున్న, ఆయనను కలుస్తున్న వ్యక్తులను బట్టి ఆయన పార్టీ త్వరలోనే ప్రజలముందుకు రావడం ఖాయమని తెలుస్తోంది. మరోవైపు ఆయన నటనకు కూడా తాత్కాలికంగా స్వస్తి చెప్పినట్లేనని వినిపిస్తోంది. చిరంజీవి పార్టీ లోగో కూడా పూర్తయినట్లు వార్తలు వెలువడ్డాయి. తెలుగు వెలుగుగా పార్టీకి నామకరణం చేయనున్నట్లు చెబుతున్నారు.