చిరు, బాబు కలిస్తే ఇంతే: నారాయణ

తిరుపతి: తెలుగుదేశం పార్టీతో మెగాస్టార్ చిరంజీవి పెట్టబోయే పార్టీ పొత్తు పెట్టుకుంటే వామపక్షాలు వేరే దారి వెతుక్కుటాయని సిపిఐ రాష్ట్ర కార్యదర్శి కె. నారాయణ అన్నారు. తనకు మద్దతిచ్చే పార్టీలను కూడా తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు దూరం చేసుకుంటున్నారని ఆయన సోమవారం మీడియా ప్రతినిధుల సమావేశంలో అన్నారు. చంద్రశేఖరరావుకు సొంత ఆధిపత్యమే ముఖ్యమని ఆయన అన్నారు.

వామపక్షాలను తోక పార్టీలుగా చంద్రశేఖరరావు అభివర్ణించడంపై ఆయన తీవ్రంగా మండిపడ్డారు. వామపక్షాలు చరిత్రను తిరగరాస్తాయని, తోక పార్టీలే పెద్ద తలలున్న పార్టీలను ఆడిస్తాయని ఆయన అన్నారు. యుపిఎ ప్రభుత్వానికి వామపక్షాల మద్దతు పరిశీలన జరుగుతోందని ఆయన చెప్పారు.