బాబుపై హరి ఆరోపణ తేలాలి: ఉండవల్లి

హైదరాబాద్: దొంగ నోట్ల వ్యవహారంతో తెలుగుదేశం పార్టీ అధ్యక్షుడు నారా చంద్రబాబునాయుడుకు సంబంధం ఉందని ఆ పార్టీ రాజ్యసభ సభ్యుడు హరికృష్ణ ఆరోపణ విషయం ముందు తేలాలని కాంగ్రెస్ పార్లమెంటు సభ్యుడు ఉండవల్లి అరుణ్ కుమార్ అన్నారు. తాను చేసిన ఆరోపణపై తెలుగుదేశం పార్టీ నాయకురాలు నన్నపనేని రాజకుమారి చేసిన వ్యాఖ్యపై ఆయన సోమవారం మీడియా ప్రతినిధుల సమావేశంలో తీవ్రంగా ప్రతిస్పందించారు.

దొంగనోట్లకు సంబంధించి హరికృష్ణ గతంలో చేసిన ఆరోపణకు చంద్రబాబు వివరణ ఇవ్వాలని ఆయన డిమాండ్ చేశారు. ఆ తర్వాత అన్ని విషయాలపై తాను బహిరంగ చర్చకు సిద్ధమని ఆయన అన్నారు. హరికృష్ణ చేసిన ఆరోపణలకు సంబంధించిన వివరాలు ప్రజలు తెలుసుకోవాల్సిన అవసరం ఉందని ఆయన అన్నారు. పాత చరిత్రలు చాలా ముందుకు వస్తాయని నన్నపనేని రాజకుమారి చేసిన ఆరోపణకు ప్రతిస్పందిస్తూ తాను అందుకు కూడా సిద్దమేనని, పాత చరిత్రలు కూడా వెలుగు చూడాల్సిన అవసరం ఉందని ఆయన అన్నారు.