టీడీపీ ఎమ్మెల్యేకే దిక్కు దివాణం లేదు.. పోలీసులపై యార్లగడ్డ సంచలన కామెంట్స్!
కృష్ణా జిల్లా గన్నవరం రాజకీయం ఒక్కసారిగా గెటెక్కింది. స్థానిక ఎమ్మెల్యే, ప్రభుత్వ విప్ యార్లగడ్డ వెంకట్రావు సొంత నియోజకవర్గంలో ఖాకీల వైఖరిపై తీవ్రస్థాయిలో తిరుగుబాటు బావుటా ఎగురవేశారు. "ఎమ్మెల్యేకే దిక్కు దివాణం లేని దయనీయ స్థితి నెలకొంది" అని స్పష్టం చేసేలా పోలీసుల తీరుపై ఆయన విరుచుకుపడ్డారు. నియోజకవర్గంలో శాంతిభద్రతల క్షీణత, వరుస హత్యలు, పోలీసుల అక్రమ వసూళ్ల వ్యవహారం ఇప్పుడు రాష్ట్రవ్యాప్తంగా తీవ్ర చర్చనీయాంశంగా మారింది.
వినాయక చవితి వేడుకలకు అడ్డంకులు.. అసలు కోపం దేనికి?
కేసరపల్లిలో కేవీసీసీ యూత్ ఆధ్వర్యంలో నిర్వహించాలనుకున్న 'గ్రాండ్ గణేష్ ఆగమన్' కార్యక్రమానికి పోలీసులు అనుమతి నిరాకరించి అడ్డుకోవడమే ఈ వివాదానికి మూలకారణంగా మారింది. గతంలో అయ్యప్ప పడిపూజలకు లేని అడ్డంకులు, వినాయక మండపానికి ట్రాఫిక్ నెపంతో ఎందుకు పెడుతున్నారని యార్లగడ్డ నిలదీశారు. కోడిపందాల నిర్వాహకుల వద్ద రూ.30 లక్షలు నజరానా తీసుకున్నట్లుగా, ఈ గణేష్ ఉత్సవాల నిర్వాహకులు పోలీసులకు మామూళ్లు సమర్పించుకోలేదనే కారణంతోనే ఈ వేడుకలను అడ్డుకున్నారని ఆయన సంచలన ఆరోపణలు చేశారు.
మూడు మర్డర్లు జరిగినా ఎమ్మెల్యేకి సమాచారం ఇవ్వరా?
గన్నవరంలో పోలీసుల తీరు ప్రోటోకాల్ను పూర్తిగా కేర్ చేయకుండా ఉందనడానికి ఇటీవల జరిగిన ఘటనలే నిదర్శనమని ఎమ్మెల్యే ధ్వజమెత్తారు. నియోజకవర్గంలో ఏకంగా ముగ్గురు చిన్నారులు దారుణ హత్యకు గురై 180 రోజులు గడుస్తున్నా.. కనీసం కేసు నమోదు చేయకపోవడం వెనుక ఎవరిని కాపాడేందుకు ప్రయత్నిస్తున్నారని ప్రశ్నించారు. ఎమ్మెల్యేగా ఉన్న తనకు నియోజకవర్గంలో హత్యలు జరిగినా కనీస సమాచారం ఇవ్వకపోవడం ఖాకీల నిర్లక్ష్యానికి అద్దం పడుతోందన్నారు. జిల్లా ఎస్పీ మాజీ మంత్రితో కుమ్మక్కయ్యారని, అసలు గన్నవరం పోలీసులు ఏ రాజకీయ పార్టీకి కొమ్ము కాస్తున్నారో అర్థం కావడం లేదని సంచలన వ్యాఖ్యలు చేశారు.
ఇండస్ట్రీస్ నుంచి బెదిరింపులు.. దందా కోసమే స్టేషన్లు?
పోలీస్ స్టేషన్ల నిర్మాణం, మరమ్మతుల పేరుతో స్థానిక పారిశ్రామికవేత్తలను బెదిరించి బలవంతపు వసూళ్లకు పాల్పడుతున్నారని యార్లగడ్డ తీవ్రస్థాయిలో విరుచుకుపడ్డారు. నిధులు కావాలంటే స్వయంగా తానే రూ.2 కోట్ల సీఎస్ఆర్ (CSR) నిధులు తెచ్చి ఇస్తానని, పరిశ్రమల వద్ద అక్రమ దందాలు తక్షణమే ఆపాలని హెచ్చరించారు. అంతేకాకుండా ప్రాంతంలో గంజాయి విక్రయాలు బహిరంగంగా సాగుతున్నా పోలీసులు పట్టించుకోవడం లేదని మండిపడ్డారు. గతంలో సంక్రాంతి సంబరాల సమయంలో కూడా లక్షలాది రూపాయలు వసూలు చేసి వేడుకలను అడ్డుకున్నారని టీడీపీ నేతలు కూడా ఆరోపించారు.
ముఖ్యమంత్రి, లోకేష్ వద్దకు గన్నవరం పంచాయితీ!
ఖాకీల అత్యుత్సాహం, అవినీతి అక్రమాలపై సమగ్ర విచారణ జరిపించాలని యార్లగడ్డ డిమాండ్ చేశారు. త్వరలోనే గన్నవరం పోలీసుల వ్యవహారశైలిని, వారి అవినీతికి సంబంధించిన ఆధారాలను ముఖ్యమంత్రి నారా చంద్రబాబు నాయుడు, మంత్రి నారా లోకేష్ ల దృష్టికి తీసుకువెళ్లి చర్యలు కోరతానని స్పష్టం చేశారు. సొంత ప్రభుత్వంలోనే ఎమ్మెల్యే స్థాయి నాయకుడు పోలీసులపై ఈ స్థాయిలో విరుచుకుపడటంతో కృష్ణా జిల్లా రాజకీయాల్లో తీవ్ర కలకలం రేగుతోంది.
Click it and Unblock the Notifications
Sign in with Google
