చార్జీషీటుకు సియల్పీ వాస్తవ పత్రం

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డి ప్రభుత్వంపై తెలుగుదేశం పార్టీ విడుదల చేసిన చార్జీషీటుకు పోటీగా కాంగ్రెస్ శాసనసభా పక్షం (సియల్పీ) వాస్తవపత్రం విడుదల చేసింది. మొత్తం 48 అంశాల్లో గత తెలుగుదేశం ప్రభుత్వం హయాంలో ప్రస్తుత తెలుగుదేశం ప్రభుత్వ హయాంలో జరిగిన అభివృద్ధిని బేరీజు వేస్తూ ఈ వాస్తవ పత్రాన్ని విడుదల చేసింది. సంక్షేమ పథకాలను అన్నింటినీ రద్దు చేసి ఇప్పుడు ఇస్తామని తెలుగుదేశం పార్టీ అధ్యక్షుడు చెప్తే ఎవరు నమ్ముతారని ఈ సందర్భంగా ఆర్థిక మంత్రి కె. రోశయ్య మంగళవారం మీడియా ప్రతినిధుల సమావేశంలో ప్రశ్నించారు.

తమ ప్రభుత్వంపై తెలుగుదేశం పార్టీ అవాస్తవ ఆరోపణలు మానుకోవాలని ఆయన సూచించారు. తెలుగుదేశం ప్రభుత్వం విద్యుత్ చార్జీలను 150 రూపాయల నుంచి 825 రూపాయలకు పెంచితే తాము రైతులకు ఉచిత విద్యుత్తు ఇస్తున్నామని ఆయన చెప్పారు. ఎన్టీఆర్ కు ఇష్టమైన రెండు రూపాయలకు కిలో బియ్యం పథకాన్ని చంద్రబాబు రద్దు చేస్తే తాము కొనసాగిస్తున్నామని ఆయన అన్నారు. విద్యుత్ చార్జీలు పెంచవద్దని ఆందోళన చేసినందుకు చంద్రబాబు నలుగురిని కాల్చి చంపారని ఆయన అన్నారు.