కెసిఆర్ సొంత ఎజెండా: వైయస్

హైదరాబాద్: తెలంగాణపై వ్యక్తిగత ఆలోచనలు మానుకుని చాలా కాలమైందని, పార్టీ అధిష్టానవర్గం నిర్ణయాలకే కట్టుబడి ఉన్నానని ముఖ్యమంత్రి డాక్టర్ వైయస్ రాజశేఖర రెడ్డి చెప్పారు. తెలంగాణ కోసం పార్టీ అధిష్ఠానవర్గం కృషి చేస్తున్నా తెలంగాణ రాష్ట్ర సమితి (తెరాస) అభివృద్ధిని అడ్డుకుంటోందని ఆయన మంగళవారం మీట్ ప్రెస్ కార్యక్రమంలో అన్నారు. గత మూడు నెలలుగా తెలంగాణలో అభివృద్ధి ఆగిపోయిందని ఆయన అన్నారు. తెరాస అధ్యక్షుడు కె. చంద్రశేఖరరావు సొంత ఎజెండా కోసమే ఉప ఎన్నికలు తెచ్చారని ఆయన విమర్శించారు. తెలంగాణ సెంటిమెంట్ ఉందని, అయితే ఉప ఎన్నికలు రెఫరెండం కాదని ఆయన అన్నారు. తెలంగాణపై రెండో ఎస్సార్సీ వేస్తామని ఎన్నికల మేనిఫెస్టోలో చెప్పామని, రెండో ఎస్సార్సీని ఎవరు అడ్డుకున్నారో చెప్పామని, రెండో ఎస్సార్సీ వేసేందుకు ఇప్పటికైనా సిద్ధమేనని ఆయన చెప్పారు.

సాగునీటి ప్రాజెక్టుల్లో అవినీతి లేదని, ప్రతిపక్షాలు చేస్తున్న విమర్శిల్లో నిజం లేదని ఆయన అన్నారు. తమపై వచ్చిన ఆరోపణలపై విచారణలకు ఆదేశిస్తామని, కొన్ని విషయాల్లో సిబిఐ విచారణకు కూడా అప్పగించామని ఆయన చెప్పారు. అభివృద్ధి, సంక్షేమ కార్యక్రమాలను విశ్లేషించి ప్రజలు మంచి నిర్ణయం తీసుకుంటారనే నమ్మకం తమకు ఉందని ఆయన చెప్పారు. తాము గత నాలుగేళ్లలో అభివృద్ధి, సంక్షేమ పథకాలు చేపట్టామని ఆయన చెప్పారు. గాంధీ జయంతి నాటికి అన్ని జిల్లాల్లో ఆరోగ్యశ్రీ పథకాన్ని అమలు చేస్తామని ఆయన చెప్పారు. తాము చెప్పినవన్నీ చేసి చూపించామని ఆయన అన్నారు.