అయేషా కేసు: పోలీసు కస్టడీకి లడ్డూ

విజయవాడ: విజయవాడ విద్యార్థిని అయేషా హత్య కేసులో గుర్విందర్ సింగ్ అలియాస్ లడ్డూను పోలీసు కస్టడీకి అప్పగిస్తూ విజయవాడ మెజిస్ట్రేట్ కోర్టు గురువారం ఆదేశాలు జారీ చేసింది. పది రోజుల పాటు లడ్డూను తమ కస్టడీకి అప్పగించాలని కోరుతూ పోలీసులు పిటిషన్ వేశారు. ఈ పిటిషన్ పై ఇరు వర్గాల వాదనలు విన్న అనంతరం లడ్డూను 8 రోజుల పాటు ఈ నెల 23వ తేదీ వరకు పోలీసు కస్టడీకి అప్పగిస్తూ కోర్టు ఆదేశాలు జారీ చేసింది.

రాజమండ్రి జైలులో ఉన్న లడ్డూను గురువారం సాయంత్రం ఐదు గంటలకు పోలీసులు తమ కస్టడీలోకి తీసుకుంటారు. తిరిగి 23వ తేదీ సాయంత్రం 5 గంటలకు కోర్టుకు అప్పగిస్తారు. లడ్డూపై థర్డ్ డిగ్రీ ప్రయోగించరాదని, పూర్తి ఆరోగ్యవంతుడిగా అప్పగించాలని కోర్టు పోలీసులను ఆదేశించింది. అయేషా హత్య కేసులో తన ప్రమేయం లేదని, ఈ కేసును అంగీకరిస్తే తనకు 25 లక్షల రూపాయలు ఇస్తామన్నారని లడ్డూ ఇదివరకు అన్నారు. లడ్డూ పోలీసు కస్టడీపై అతని తండ్రి తీవ్ర ఆందోళన వ్యక్తం చేస్తున్నారు. తన కొడుకుకు పోలీసుల నుంచి ప్రమాదం ఉందని ఆయన అన్నారు.