కెసిఆర్ తేల్చుకోవాలి: రాజ్ నాథ్ సింగ్

హైదరాబాద్: వచ్చే ఎన్నికలనాటికైనా పొత్తు విషయంలో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు ఆలోచించాలని భారతీయ జనతా పార్టీ (బిజెపి) జాతీయాధ్యక్షుడు రాజ్ నాథ్ సింగ్ సూచించారు. వచ్చే ఎన్నికల నాటికి తమ పార్టీతో పెట్టుకోవాలా, వద్దా అనే విషయంపై కెసిఆర్ నిర్ణయం తీసుకోవాలని ఆయన అన్నారు. కర్ణాటకలో ఎన్నికల ప్రచారానికి వెళ్తూ ఆయన గురువారం హైదరాబాదులోని విమానాశ్రయంలో కాసేపు ఆగారు. ఈ సందర్భంగా ఆయన మీడియా ప్రతినిధులతో మాట్లాడారు.

తెలంగాణపై సరైన సమయంలో నిర్ణయం తీసుకుంటామని ఉమ్మడి కార్యాచరణ ప్రణాళిక (సియంపి)లో హామీ ఇచ్చిన యుపిఎ ప్రభుత్వం నాలుగేళ్లు గడిచినా నిర్ణయం తీసుకోలేదని ఆయన విమర్శించారు. తెలంగాణపై యుపిఎ ఇచ్చిన హామీని యుపిఎ ప్రభుత్వం విస్మరించిందని ఆయన అన్నారు. వచ్చే ఎన్నికల్లో జాతీయ ప్రజాస్వామ్య కూటమి (ఎన్డీయే) అధికారంలో వస్తే తెలంగాణ రాష్ట్రాన్ని ఏర్పాటు చేస్తామని ఆయన చెప్పారు.