వైయస్ కు చేవెళ్ల సెంటిమెంటు

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డి మదిలో చేవెళ్ల సెంటిమెంటు బలంగా నాటుకుంది. ఉప ఎన్నికల ప్రచారాన్ని ఆయన గురువారం చేవెళ్ల నుంచి ప్రారంభించారు. 2004లో చేవెళ్ల నుంచి ఎన్నికల ప్రచారం ప్రారంభించి ఘనవిజయం సాధించామని, వచ్చే ఎన్నికల్లో కూడా చేవెళ్ల నుంచే ఎన్నికల ప్రచారాన్ని ప్రారంభిస్తానని ఆయన చేవెళ్ల బహిరంగ సభలో చెప్పారు. అభివృద్ధి, సంక్షేమ పథకాలను అమలు చేస్తున్న తనకు ప్రజలను ఓట్లు అడిగే హక్కు ఉందని ఆయన చెప్పారు. తాను ప్రజలను ధైర్యంగా ఓట్లు అడుగుతానని ఆయన చెప్పారు.

చేవెళ్ల నుంచి తాను ఎన్నికల ప్రచారం ప్రారంభిస్తున్నందున ఉప ఎన్నికల్లో కాంగ్రెస్ మెజారిటీ సీట్లు గెలుచుకుంటుందని ఆయన చెప్పారు. వచ్చే ఎన్నికల్లో కూడా కాంగ్రెస్ గెలుస్తుందని ఆయన చెప్పారు. ప్రాణహిత నీటిని తరలించి చేవెళ్ల, తాండూరు ప్రాంతాలను సస్యశ్యామలం చేస్తామని ఆయన హామీ ఇచ్చారు. ఎన్నికల్లో ఇచ్చిన హామీలను తన ప్రభుత్వం అమలు చేస్తోందని ఆయన చెప్పారు. ప్రభుత్వం చేపట్టిన అభివృద్ధి, సంక్షేమ కార్యక్రమాలను ఆయన వివరించారు.