తెలంగాణ సెంటిమెంట్ నిజమే: రోజా

నిజామాబాద్: తెలంగాణ సెంటిమెంటు ఉన్న మాట నిజమేనని, అయితే దాని కోసం పోరాడుతున్న నాయకులు సరైన వారు కాదని తెలుగు మహిళ అధ్యక్షురాలు రోజా అన్నారు. డిచ్ పల్లి శాసనసభా నియోజకవర్గంలో ఆమె తెలుగుదేశం పార్టీ అభ్యర్థి తరఫున మంగళవారం ప్రచారం చేశారు. కాంగ్రెస్ ప్రభుత్వంపై, తెలంగాణ రాష్ట్ర సమితి (తెరాస) నాయకులపై ఆమె తీవ్ర విమర్శలు చేశారు.

తెరాస అధ్యక్షుడు కె. చంద్రశేఖరరావు ప్రజలను గాలికొదిలేస్తున్నారని, ఏ పనీ చేయడం లేదని ఆమె అన్నారు. తెలంగాణకు కాపలా కుక్కలా ఉంటానన్న కెసిఆర్ తాను కేంద్ర మంత్రి పదవి తీసుకున్నారని, అల్లుడు హరీష్ రావుకు రాష్ట్ర మంత్రి పదవి ఇప్పించుకున్నారని ఆమె అన్నారు. ఇప్పుడు కెసిఆర్ కుమారుడు రామారావు కూడా వచ్చారని, రామారావును సిద్ధిపేట నుంచి పోటీకి పెట్టబోతున్నారని, ఇంకా కెసిఆర్ భార్య, ఇతర బంధువులు వస్తారని ఆమె అన్నారు. బిసీలను కెసిఆర్ పట్టించుకోవడం లేదని ఆమె విమర్శించారు. పార్టీని బలోపేతం చేసుకునే వరకు నరేంద్రను వాడుకుని ఆ తర్వాత మెడలు పెట్టి బయటకు గెంటారని ఆమె అన్నారు.