కెసిఆర్ తెలంగాణకు అడ్డు: డిఎస్

హైదరాబాద్: తెలంగాణవాదానికి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావే అడ్డుపడుతున్నారని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ విమర్శించారు. వివిధ టీవీ చానెళ్లకు ఇచ్చిన ఇంటర్వ్యూల్లో ఆయన శుక్రవారం తన అభిప్రాయాలను వెల్లడించారు. కెసిఆర్ ఒంటెత్తు పోకడలతో వ్యవహరిస్తున్నారని ఆయన అన్నారు. తెలంగాణపై కలిసి పోరాడుదామని ఏ రోజైనా అన్నారా అని ఆయన అడిగారు. తెలంగాణవాదాన్ని వాడుకుని రాజకీయం చేయాలని కెసిఆర్ చూస్తున్నారని ఆయన వ్యాఖ్యానించారు.

తెలంగాణవాదాన్ని బలహీనపరిచేందుకే కెసిఆర్ ప్రయత్నిస్తున్నారని ఆయన అన్నారు. మాటిమాటికీ తెలంగాణపై ఎన్నికల ద్వారా పరీక్ష పెట్టడం సరి కాదని ఆయన అన్నారు. తెలంగాణకు తాము కట్టుబడి ఉన్నామని ఆయన అన్నారు. ఉప ఎన్నికల ఫలితాలు ముఖ్యమంత్రి డాక్టర్ వైయస్ రాజశేఖర రెడ్డి నాయకత్వంపై ప్రభావం చూపవని ఆయన అన్నారు. తాము ఉప ఎన్నికల్లో మెజారిటీ స్థానాలు సాధిస్తామని ఆయన చెప్పారు. తమకు రెండు లోకసభ స్థానాలు, ఎనిమిది అసెంబ్లీ స్థానాలు వస్తాయని ఆయన ధీమా వ్యక్తం చేశారు.